الأوقاف ناصحة عبر صحح مفاهيمك: السوشيال ميديا خدت جزء كبير مننا.. سيب تليفونك وأقعد مع أهلك

نشرت وزارة الأوقاف منشورا جديدا عبر صفحاتها على مواقع التواصل الاجتماعي ضمن مبادرة صحح مفاهيمك بعنوان: "سيب تليفونك واقعد مع أهلك شوية".

وبدأت الوزارة منشورها: "في الزمن ده، السوشيال ميديا والموبايلات خدت جزء كبير من وقتنا، لدرجة إننا بقينا قاعدين مع أهلنا بالجسد لكن العقل في عالم تاني، ووسط زحمة الحياة والانشغالات اليومية، محتاجين نرجّع الدفء لعيلتنا ونخصص وقت حقيقي معاهم، بعيد عن الشاشات".

وأضافت: "اللحظات اللي مع أهلنا هي اللي بتخلينا نحس بالراحة والسكينة، وهي اللي بتفضل في الذاكرة بعد سنين طويلة، مستشهدة بحديث نبوي: "سيدنا النبي ﷺ كان خير قدوة في التعامل مع أهله، كان يشاركهم حياتهم ويهتم بأدق تفاصيلهم، وكان يقول: "خيركم خيركم لأهله، وأنا خيركم لأهلي" (رواه الترمذي)".

وأوضحت: "الرحمة والمودة اللي بنقدمها لأهلنا مش بس بتقوي علاقتنا بيهم، لكنها كمان عبادة نتقرب بيها إلى الله جل جلاله والقرب من الأسرة هو اللي بيبني جيل سوي عنده حب ودفء يحميه من قسوة الحياة والوقت مع العيلة مش لازم يكون طويل، لكن لازم يكون حقيقي".

وأكملت: "جلسة بسيطة، لعب مع الأولاد، ضحكة صادقة، مشاركة في قراءة القرآن أو حتى حديث هادئ يجمع أفراد الأسرة، كلها حاجات صغيرة لكن أثرها بيكون كبير في قلوبنا".

واختتمت: "الأب اللي يسمع لأولاده، والأم اللي تحتضن بناتها، هيكونوا أقرب ليهم من أي حد تاني.. سيب تليفونك، واقعد مع أهلك، وادّيهم من وقتك واهتمامك. لأن أجمل الذكريات بتتعمل وسط الأسرة، وأغلى اللحظات هي اللي بنعيشها مع الناس اللي بنحبهم".