الفنانة الشابة ياسمين العبد عن مشاركتها بـ”لام شمسية”: “كنت متوترة”

علّقت الفنانة الشابة ياسمين العبد، على مشاركتها في مسلسل "لام شمسية" من خلال شخصية "زينة"، وقالت: “هكمل 19 سنة في يونيو الجاي، بحب الفن من وأنا صغيرة، وكان عندي ثقة إن ده هيحصل، بدأت أهتم بالكورال والباليه، والكواليس اللي كنت بشوفها فيهم خلتني أكتشف إن ميولي الحقيقية هي التمثيل”.

وأضافت “العبد”، خلال لقائها في برنامج "كلمة أخيرة"، مع الإعلامية لميس الحديدي عبر قناة ON، :"كنت بتفرج على مسلسلات ديزني، ولفت نظري المشاهد اللي بتتكلم عن الكواليس. عرفت إن فيه مخرج وفيه كاتب، وبدأت أحس إن التمثيل هو حلمي، بدأت أزن على أهلي عشان أبدأ، وكان أول رد منهم هو الرفض، لأن ما فيش حد في العيلة ليه علاقة بالفن. كانوا شايفين إني شاطرة، بس مش عارفين أبدأ منين".

وأشارت إلى أنها بدأت مشوارها الفني بالإعلانات، ثم شاركت في أول دور لها بفيلم قصير بعنوان "ظل القاهرة"، يتناول قصة فتاة تتعرض للتحرش، مضيفًا: “وقتها حسيت بمسؤولية الفن في طرح القضايا المجتمعية، وإن التمثيل ممكن يكون صوت لقضايا حقيقية”.

وكشفت ياسمين أنها قرأت دور "زينة" لأول مرة وهي في الخامسة عشرة من عمرها، متابعة: “كنت لسه عندي 15 سنة لما قريت بعض الحلقات، ومن ساعتها وأنا بتمنى أشتغل مع المخرج كريم الشناوي”.

وعبّرت عن فخرها بالتجربة، قائلة: “فخورة جدًا إني اشتغلت مع كريم الشناوي، وأتمنى أكرر التجربة معاه كتير”، مضيفة: “كنت متوترة طبيعي، مش عارفة أعمل الشخصية إزاي في البداية، لكن ماكنتش خايفة منها. اعتمدت في التحضير على الفريق كله، وكلنا كنا بنشتغل بروح واحدة”.