انتصار: الأب عمود البيت ووجوده عظمة وقوة

أشارت الفنانة انتصار إلى ضرورة وجود الأب في حياة أسرته وجلوسه برفقتهم في المنزل، موضحة أن الزوج ليس عدوًا لزوجته إذا كان له تعليقات على أي شيء له علاقة بالمنزل، وعليها تقبله.

وقالت انتصار في مقدمة برنامج “من غير نفسنة” الذي تقدمه مع الفنانة بدرية طلبة ونوليا، عبر شاشة قناة “هي”: الأب عمود مهم في البيت، وإحنا مش حابسين الراجل ولكن عايزين الغالبية العظمى من وقته أن تبقى قاعدته في البيت بإرادته، ولما يجي يلف في البيت ويلاقي حاجة بايظة يصلحها.

وتابعت انتصار: في حاجات بسيطة الراجل لازم يعملها بتبقى ساترة البيت، زي أنه يصلح الحاجات البايظة ويكون عنده عدة في البيت، لو عمل ده مش هيدخل بيته راجل غريب، الأب وجوده في البيت عظمة وقوة، الله على دخلة الأب وهو داخل البيت وهو جايب فاكهة وبيدلع البيت، ولما يصلي ويضم العيال ويعلمهم.

وعلقت الفنانة بدرية طلبة على حديث انتصار، قائلة: البنت والولد لو ملاقوش أب يتكلموا معاه هيتكلموا برا، والأب لو مشبعبش بنته حب ودفا وحنان في بيته هتدور عليه برا، وفي جوازات كتير فاشلة أن البنت مفيش أب وراها ولا حنية بالتالي اتجوزت راجل كبير.

وأضافت انتصار: في بنات بيبقى والدها متوفي فتبقى عائلة الأم مقربة ليها والخالد والجد بيعوضوا أكتر، والخيلان دول عليهم مسؤولية كبيرة وبيقولوا الخال أب، والخالة أم.

واستكملت انتصار: في ناس بتطلع شائعات ويطلعوها في دماغ الناس، أن الراجل بيقعد في البيت ينكش ويقول البيت مش نضيف، ما هو المفروض البيت يكون نضيف، على فكرة ده مش عدو ده البيت بيته، ده صاحب البيت، والعيال مكتوبة باسمه، وحتى لو علق على حاجة في البيت هو عدو؟.