أحمد سعد: جودي بنتي ضيعتلي آمالي إن أطلعها دكتورة وعايزة تطلع فنانة
يستعد الفنان أحمد سعد لإحياء حفله الغنائي مساء اليوم ضمن فعاليات "يلا ساحل" بمدينة العلمين الجديدة، في حفل يشهد مشاركة ابنته جودي معه على المسرح، إلى جانب إطلاق ألبومه الغنائي الجديد "الإلكترو"، في تجربة مختلفة يقدم خلالها عددا من المفاجآت لجمهوره.
وتحدث أحمد سعد عن تفاصيل الحفل، مؤكدا أن التجربة مختلفة عن كل ما قدمه من قبل، قائلا: "النهارده دي تجربة جديدة عليا، والتجربة دي مختلفة عن حياتي كلها، وأنا أصلا أول مرة في حياتي أطلع على المسرح وأنا خايف بحجم الخوف ده".
وأضاف: "الشكل اللي هقدمه النهارده في الحفلة يختلف عن أي حاجة قدمتها قبل كده، وقلت إن أنا لازم أقدم أشكال جديدة، وأقدم أشكال يكون فيها تنوع، وآخر حاجة عملتها عملت (كوتي)، وعملت كل اللي عليا في إن الناس تبقى مفرفشة".
وتابع أحمد سعد: "كمان عايز أعمل أشكال بحبها، عايز أعمل موسيقى عربية، وعايز أعمل حاجات مختلفة".
وعن مشاركة ابنته جودي معه في الحفل، كشف أحمد سعد عن مفاجأة طريفة، موضحا أنها اشترطت عليه الغناء معه مقابل الموافقة على دراسة الطب في لندن، قائلا: "جودي هي بقى أكتر حاجة حصلتلي في حياتي غصب عني، لأنها ضحكت عليا وقالتلي لو عايزني أدرس طب في لندن لازم تخليني أغني معاك".
وأضاف: "فقولت ممكن أخليها تغني معايا في أغنية تقول كلمة في الأول وكلمة في الآخر عشان الناس متعرفهاش، فجأة دلوقتي بمشي معاها في الشارع الناس بتسلم عليها ومبتسلمش عليا".
واختتم أحمد سعد حديثه عن ابنته جودي قائلا: "جودي بنتي ضيعتلي آمالي إني أطلعها دكتورة، وعايزة تطلع فنانة".
