أحمد موسى يطالب الحكومة بزيادة شرائح الكهرباء على الأغنياء: ادفع علشان الدنيا تمشي.. شوف أنت جايب عربية بكام

دعا الإعلامي أحمد موسى، الحكومة إلى زيادة كلفة فواتير الكهرباء على شرائح الاستهلاك المرتفعة التي تخص الأغنياء، قائلا: «الأمور في غاية الصعوبة والخطورة، أنا النهاردة آجي على الغني، ما يتحمل شوية، إيه المشكلة؟ إيه المشكلة لما أزود شرائح الكهرباء على الأغنياء».
وأكد خلال برنامج «على مسئوليتي» المذاع عبر «صدى البلد» أن الغالبية العظمى من الشعب المصري في الصعيد والدلتا والقاهرة يندرجون تحت شرائح الاستهلاك البسيطة من الكهرباء.
وقال: «أهالينا استهلاكهم بسيط محدش ييجي جنبهم، آجي على الغني، ما تدفع شوية إيه المشكلة؟ ادفع علشان الدنيا تمشي، ما أنت عندك مقدرة تدفع، وبتشتري بنزين 95 ادفع، إيه المشكلة؟ ما أنت جايب عربية بكام؟ يعني جات على دول؟! ادفعهم يا سيدي، طبعا الناس هتقعد تشتم، تشتم، مش مهم ولا يفرق معايا، أنا يفرق معايا حاجة واحدة؛ البلد، ومواطننا العظيم اللي واخد باله من بلده، وخايف عليها كويس أوي».
وناشد الدكتور مصطفى مدبولي رئيس الوزراء بضرورة حماية الفئات البسيطة وعدم الاقتراب منها، قائلا: «أقول لرئيس الوزراء متجيش على هؤلاء، حق ربنا؛ هل حد عنده مشكلة الغني يدفع شوية كهرباء زيادة؟ الإجابة لأ، هو عنده كام تكييف وكام تلفزيون.. اللي عنده شاشة واحدة في بيته وعنده لمبتين ثلاتة، واستهلاكه بسيط محدود، ولا اللي مشغل مليون حاجة، وبالمناسبة حتى اللي مشغل مليون حاجة، لازم يخفف كمان شوية، عشان يقلل كمان من استهلاكه، ما إحنا عايزين نعمل ترشيد كمان، كلنا نعمل ترشيد».
وطالب بالتوسع في العدادات مسبقة الدفع؛ لتمكين المواطن من مراقبة استهلاكه وتجنب مشكلات القراءات، مع تشديد الرقابة والمحاسبة القانونية ضد سارقي التيار الكهربائي، مشددا أن: «أي حد يسرق الكهرباء لازم يروح المحكمة».
وعبر عن فخره بما حققته الدولة المصرية من إنجازات في البنية التحتية، لاسيما شبكات توزيع الكهرباء التي امتدت إلى قلب الصحراء، مؤكدا أن هذه الأعمدة باتت تُصنع الآن في مصر.