الدكتور فتحي الشرقاوي يكتب: أكبر أكذوبة نعيشها
عارف إيه أكبر أكذوبة بتضحك بيها على نفسك ؟
إنك تتخيّل إن في شخص في حياتك كل سعادتك وتعاستك متوقفة عليه؛ لو قالك كلمة حلوة تعيش السعادة والأفراح، ولو قالك كلمة تزعلك تلاقي الدنيا كلها اسودّت واتقفلت في وشّك.
نصيحتي ليك: ياريت تتخلّص بسرعة من الفكرة الغلط دي؛ لأنها لو سيطرت على دماغك هتلاقي نفسك طول عمرك واقع تحت رحمة الشخص اللي بيتحكم فيك ويُسيطر عليك.
مين أقنعك إن وجعك ومعاناتك مش هتزول إلا لما ييجي شخص معيّن في حياتك يطبطب عليك ويحتويك؟ لازم تعرف إن مفيش شخص في الدنيا ممكن يكون حاسس بيك قدّك إنت. آه ممكن حد يشاركك ويتعاطف معاك شوية وقت، لكن مش بنفس إحساسك... لأ... لأ... لأ...
خليك قوي وما تعتمدش على أي شخص يسندك. إنت مش طفل ولا قاصر. قوم لملم بقاياك المبعثرة واستكمل بقية طريقك. ما تتسوّلش ولا تشحت نظرة عطف من أي حد علشان يسندك ويقف معاك وجنبك. محدش هيقف معاك لما تقع غيرك إنت وبس.
#مجرد_خاطرة
