أميرة عبيد تدق ناقوس الخطر: ”مش هنلاقي شباب يبني مستقبل ولا بنات تفتح بيت”
دقت الإعلامية أميرة عبيد ناقوس الخطر، بسبب إقبال الشباب على ظاهرة حفلات التكنو أو ما يسمى بحفلات الخبط المنتشرة وتناولهم مخدر الخبوط، قائلة "المصيبة السودة إن معظم الموجودين في الحفلات دي بيكونوا تحت السن 14 و15 سنة وكمان لو حد دخل الحفلة جديد ومش فاهم حاجة وعايز يجرب بيسأل أي حد في الحفلة علي حبوب الخبط لحد ما يوصل للديلر اللي بيبيع الحبوب دي".
وأضافت أميرة عبيد خلال تقديم برنامج "هي وهما" على قناة الحدث اليوم، "الكارثة هنا بقي معظم الحفلات دي اللي بينظمها هنا في مصر ناس مش مصريين ناس أجانب، يعني الناس دي بييجوا من برا يدمروا ولادنا ويخدوا فلوس وللأسف كل الأسف أولياء الأمور مبقاش عندهم مسؤولية تجاه ولادهم ولا في رقيب ولا عتيد".
تابعت: "الأم بتشوف بنتها بتكلم شاب عادي والأب يسيب ابنه يرجع البيت وش الفجر عادي ويقولك ما هو ولد مش بنت وفي الآخر نعلق الأخطاء علي شماعة البلد عملت والدولة سوت والمجتمع هو السبب ما هو المجتمع مش هيربي مكان أولياء الأمور ولو فضلنا علي الحال ده مش هنلاقي شباب يبني مستقبل ولا هنلاقي بنات تفتح بيت".
