محمود سعد يدعم لميس الحديدي بعد أزمة الحج أونلاين: إعلامية كبيرة متقولش كده

دافع الإعلامي محمود سعد عن الإعلامية لميس الحديدي، بعد الهجوم عليها بسبب تصريحاتها عن الحج اونلاين، وذلك خلال برنامجها كلمة أخيرة.

وقال محمود سعد خلال فيديو له عبر حسابه الشخصي بموقع التواصل الاجتماعي فيس بوك: لميس متقولش كدة دي إنسانة مثقفة، وإعلامية كبيرة، هي كانت بتقول اللي ممكن حد يقوله، ليه منحجش في البيت، وجابت معاها شيخ يرد.

وأضاف محمود سعد: أنا حاولت بكل جهدي أقدم ملامح خفيفة من الثقافة الدينية، لأن لازم البني آدم يكون عنده خلفية، والمفروض يكون عندنا ملامح ثقافية ودينية.

وكان قال محمود سعد: أنا من أسعد الناس إني مشيت من التلفزيون والعودة اللي هيعملوها قريب.. أنا مش هرجع.. هما هياخدوا المادة بتاعة يوتيوب ويعرضوها على قناة النهار.. هيسعدني إن الناس اللي مش بتشوف يوتيوب تتفرج عليا على قناة النهار.

وتابع: مبسمعش نفسي خالص ومبقدرش اسمع صوتي خالص، ولما حصلت كورونا معرفناش ننزل نصور باب الخلق، ومكنش عندي حاجة غير إني أحكي ولقيت استحسان عند البعض.. وبحس إن الحكايات اللي بحكيها بتمس مشاعر ناس كتير بيمروا بنفس الظرف، بيبقى فيها نوع من أنواع الطبطبة على الناس وميحسوش إنهم لوحده وإن اللي بيعمل كده يبطل.. فيها معاني كتير جدًا.

وأضاف: هبة شلبي بتشتغل معايا من سنة 2003 بقالها 20 سنة، فهي فاهمة الشغل كويس.. وهي اللي أصرت عليّا في موضوع اليوتيوب من حوالي 7 سنين ومسمتعش لكلامها غير من حوالي سنتين.. وفي يوم لقيت حوار ينفع ينزل على يوتيوب.. وبعدين هي اللي بقيت تعمل كل حاجة.

واختتم حديثه قائلًا: لم أحلم بمكانتي الحالية.. الحياة مشيت بيا في سكك متعرجة كتير.. خدتني في أماكن مش مخطط لها.. خطط لإثبات وجودي في مهنة اخترتها.. أنا خريج آداب تاريخ واخترت المهنة دي.. والمهمة كانت في غاية الصعوبة.