سامحوني للمرة الـ20 ألف.. أحمد سعد يعتذر لجمهوره ويتعهد بعدم تكرار إطلالته الغريبة
وجّه الفنان أحمد سعد رسالة اعتذار إلى جمهوره، بعد الجدل الذي أثاره ظهوره الأخير بإطلالة مختلفة، مؤكدًا أنه قرر التراجع عن أي تصرفات أو مظاهر قد تثير استياء جمهوره.
وقال أحمد سعد، في فيديو نشره عبر صفحته الرسمية على «فيسبوك»: «جمهوري الحبيب الغالي، عايزكم تكونوا معايا في اللحظة اللي جاية، وعايز أقولكم حاجة بصراحة.. أنا تبت عن أي حاجة غريبة، ومش هعمل أي حاجة غريبة تاني، ولا أي حاجة تزعل جمهوري اللي بحبه، واللي دايمًا بيقولي: إنت ليه عامل كده؟».
وأضاف: «أكيد في ناس هتقول: هو كل شوية يعمل حاجات ويرجع يعتذر ويقول سوري، لكن المهم عندي إني ما أشوفش جمهوري زعلان مني بسبب أي حاجة أعملها».
وأوضح سعد أنه أعاد التفكير في الأمر من منظور المجتمع والعادات، قائلًا: «أنا طلعت قبل كده وقلت إني مش مزعل ربنا، لكن لقيت إن الإنسان عايش وسط مجتمع، والعُرف فيه شيء مهم جدًا، وعشان كده مش هعمل حاجات غريبة تاني، وعايز أعيش في سلام وأبقى إنسانًا طبيعيًا جدًا».
وتابع: «حتى لو شغلانتي أحيانًا بتخليني أعمل حاجات مختلفة، هفضل أقول سوري ومعلش لو غلطت، وربنا دايمًا بيقبل من أي حد عايز يعيش وسط المجتمع وفي سلام».
واختتم أحمد سعد رسالته قائلًا: «لكل الناس اللي زعلت مني وقالتلي: ليه عملت كده؟.. سامحوني للمرة الـ20 ألف، هعمل إيه.. أنتم بتحبوني وأنا بحبكم.. استنونا».
