نهاد أبو القمصان ضيفة أولى حلقات بودكاست ”القومى للمرأة”
تحت عنوان "معايير النجاح"، أطلق المجلس القومى للمرأة، أولى حلقات البودكاست الذى يطلقه من داخل استوديو المجلس تحت عنوان "الكلام على ايه".
واستضافت أولى حلقات بودكاست المجلس القومى للمرأة، نهاد أبو القمصان، رئيسة المركز المصري لحقوق المرأة وعضو المجلس القومى لحقوق الإنسان، تناولت الحديث عن معايير النجاح في الحياة العملية والأسرية، وأرست خلالها مجموعة من الرسائل الهامة لتحقيق النجاح فى الحياة الأسرية والعلاقة بين الرجل والمرأة والحياة الزوجية واستشهدت بتجارب من حياتها العملية والشخصية.
حيث أكدت أبو القمصان فى رسائلها من خلال البودكاست، على أن" الحياة من غير خناقات "ماسخة" وسخيفة، وأن الجواز مش تحدي ولا إنجاز.. الجواز ونس ودفا للقلب.. وشراكة في العمر والحياة ".
وتابعت : "النجاح الحقيقي اللي يحسسك بالسعادة والامان والتميز"، مؤكدة أن مفتاح النجاح الأول لأى علاقة إن الطرفين مايهينوش بعض.
وفى حديثها عن معيار النجاح قالت "أبو القمصان": النجاح معيار واسع ونسبى ومبنى على رؤية الشخص لنفسه وفكرة النجاح بشكل عام إنك تعملى حاجه مبسوطة بيها وسعيدة وتشعرى فيها بالانجاز.. مثلا لما بعمل أكله حلوة أو احقق إنجاز فى قضية معينة"، وتابعت فى رسالتها لأى سيدة : اعملى اللى يحققلك السعادة والإنجاز ويحسسك إنك متميزة.
وعن الزواج وشريك الحياة، قالت : الجواز للست والراجل مرحلة فى الحياة لا يمكن اعتبارها كونها إنجاز ولكنها مرحلة من مراحل الحياة.. الجواز من المراحل المهمة فى الحياة وتطور مهم للرجاله والستات.
وأضافت: الجواز حاجه ليها علاقة بالونس ودفء القلب ولغة مشتركة بين الاتنين ، واستشهدت بتجربة مع أحد أساتذتها : كان حد من اساتذتى الكبار اتجوز بسببى بعد ما عدى سن الستين قلتله وبعدين مين اللى هيجى يخبط عليك.. قلتله اتجوز عيش حياتك .. النهارده عنده 82 سنة وبنته فى ثانية ثانوى .
وتابعت : بستغرب أما بشوف بنات تقول أنا مش محتاجه راجل ولما اشوف رجاله بتقول أنا مستقله بذاتى ومش محتاج ست فى حياتى .. الناس عندها مفاهيم ملغبطة وستات بتقول لنفسها يا إما اشتغل يا ابقى ست بيت .
وعن تجربتها فى الجواز، قالت : مع الجواز مكنتش بجهز بيتى عشان الناس تقول إننا شطار .. وأى اتنين مهما كانت إمكانياتهم تخطيطهم وميزانيتهم أقل كتير من اللى عايزينه.. كنا بنخطط حياتنا على ظروفنا احنا .. ومهما كنا عارفين بعض بيكون فى اختلاف فى العادات والحياة استمرت لأن عمرنا ما غلطنا فى بعض.
وأضافت: مفتاح النجاح الثانى إنك وأنتى بتختارى راجل تتجوزيه مش تبقى بتدورى على عريس ولكن تبقى بتدوري على شريك.
وقالت : البنات اللى بتبص للعربية والساعة والشقة مبتحترمش نفسها.. ولو أنتى شايفه إنك هتنجحى وتعتمدى على نفسك وتحققى اللى انتى عاوزه مش هتستى حد يجبلك العربية والخاتم والشنطة .. ولو انتى معندكيش ثقة فى نفسك ولازم تشعلقى فى قفا راجل يجبلك اللى انتى عاوزاه هتدورى على راجل يعملك كل دا.
وعن تجربتها فى اختيار شريك الحياه، قالت : بمقاييس الشقة والعربية حافظ جوزى مكنش هيبقى رقم واحد واحنا كنا وش السعد على بعض وكنا أصحاب.. كنت بدور على حد صاحبى حد يفهمني ولو هو راجل دماغه صغيرة كان لازم يطفش من أول يوم لأنى قلتله إنى مبحبش الضغط وانى شغلى مهم عندى .
يذكر أنه فى إطار جهود المجلس القومي للمرأة المستمرة لنشر الوعى بقضايا المرأة والأسرة المصرية، وحرصًا منه على تطوير أساليب وصوله إلى الجمهور، والوصول الى شريحة كبيرة من متابعي منصات التواصل الاجتماعى وخاصة الشباب، يطلق المجلس القومي للمرأة أول بودكاست يناقش قضايا المرأة والأسرة المصرية بعنوان "الكلام على ايه".
وتم تصوير حلقات البودكاست باستوديو المجلس القومي للمرأة ويعد باكورة الأعمال الإعلامية له ، ويتضمن الموسم الأول من البودكاست ثمان حلقات تقدمها الاعلامية سارة قناوى ، تناقش قضايا متنوعة منها أن العمر مجرد رقم وتأثير مواقع التواصل الاجتماعى على المراهقين وتحديات العام الأول فى الزواج وغيرها من القضايا العامة التى يقدمها نخبة من الخبراء والمتخصصين ، وسوف يتم عرضه على جميع منصات التواصل الاجتماعى الرسمية للمجلس، وقد أطلق المجلس اليوم برومو للتنويه عن البودكاست، وسوف تذاع حلقاته بدءًا من الأسبوع القادم.
تجدر الإشارة الى أن استوديو المجلس القومي للمرأة هو استوديو تلفزيونى متخصص فى إنتاج مواد اعلامية توثق جهود المجلس وأنشطته وتناقش قضايا المرأة والأسرة المصرية، وقد شهد إطلاق مواد اعلامية متنوعة خلال الانتخابات الرئاسية ٢٠٢٤.
