حمو بيكا يعتذر للجمهور عن طرح 3 أغانٍ مع علي قدورة: اتسجلوا قبل الاعتزال
اعتذر مغني المهرجانات حمو بيكا لجمهوره وزميله المعتزل علي قدورة، بسبب اعتزامه طرح 3 أغاني جديدة من تعاونهم معا خلال الأيام المقبلة، مؤكدًا احترامه لقرار «قدورة» بالاعتزال ولكن هذه الأغاني تم تسجيلها قبل هذا القرار.
ونشر حمو بيكا، عبر حسابه على موقع «انستجرام»، بوستر أغنيته الجديدة مع علي قدورة، وعلق عليها: «توضيح هام.. احنا بنقدم اعتذار رسمي ليكم جميعا على أن فاضل 3 أغاني تم تسجيلهم قبل اعتزال (علي قدورة)، الأغاني دي المفروض هتنزل الأيام اللي جاية، ومن بعدها مش هيكون فيه أي أغاني تانية لـ(علي قدورة) خالص، مع احترامنا الكامل لقراره بشأن الاعتزال، وربنا يثبته يا رب».
وكان مؤدي المهرجانات علي قدورة، أعلن اعتزاله الفن نهائيا، مؤكدا أنه سيبدأ مرحلة جديدة في حياته من الصفر مرة أخرى.
وكتب علي عبر حسابه على موقع «فيسبوك»: «السلام عليكم في يوم جمعة مبارك.. أنا علي عبد القادر السيد، الشهير بـ علي قدورة، كنت مغني قبل النهارده، في حاجة حصلتلي مش عارف إيه هي بس الحاجة دي هي اللي بتخليني اتكلم دلوقتي».
وتابع: «أنا بريء من كل عمل أو مزيكا عملتها في حياتي وبعلن اعتزالي مجال الأغاني لحد ما يفتكرني ربنا، ويا رب سامحني عن أي حاجة أنا عملتها في حياتي أو أي حاجة صدرت مني.. يارب قربني ليك وافتحلي باب رزق يرضيك، ومفيهاش حاجة لو بدأت من جديد في أي شغل بالحلال وأي فلوس معايا أنا هسيبها بالرضى لأهلي، ومش عارف هيبقي الصح إيه وهبقى لا أمتلك إلا صفر، وربنا يثبتني في الطريق ده ومش هطول عليكم بس دي نيتي، وربنا كريم وكبير وغفور رحيم».
