شريف خير الله: أحمد عبد العزيز عمل دوري في الأب الروحي

تحدث الفنان شريف خيرالله عن تجربته في مسلسل "الاختيار" مع المخرج بيتر ميمي واعتذاره عن الأب الروحي واستبداله بالفنان أحمد عبد العزيز.

وقال شريف خيرالله، ببرنامج "تفاصيل" الذي تقدمه الإعلامية نهال طايل عبر قناة "صدى البلد 2":"الحمد لله أنا كويس جدًا، ومبسوط إن ربنا أكرمني السنتين اللي
فاتوا بأعمال كانت متميزة أهمها مسلسل الاختيار؛ لأني كنت بشتغل فيه وشايف الحقائق وما يدبر ضدنا وضد بلادنا، وشرف لي العمل مع مخرج متميز بحجم بيتر ميمي".

وتابع شريف متحدثًا عن بيتر ميمي: «هو اكتشاف بالنسبة لي في المسلسل، وبلاقيه بيعمل حركة كاميرا غريبة مشفتهاش قبل كدة، ومخرج مبدع ودي تاني مرة أشتغل معاه، وكانت التجربة الأولى بينا بمسلسل كلبش».

واستكمل: «قدمت أيضا مسلسل (اللي خلف مامتش) وكان عملا مهم بالنسبة لي عشان بيناقش قضية الورث، وهو من إخراج أحمد شفيق».

وعن تجربة مسلسل «الأب الروحي»، أضاف: «اتعرض عليا الأب الروحي الجزء الأول وكان عندي وقتها شوية مشاكل، وكنت بقلق من شركات الإنتاج الجديدة،
وعرفت إن محمود حميدة موجود في العمل فكلمته قولتله باعتلي عشان أشارك في الأب الروحي، فقالي (أنا بعمل فيه 7 حلقات وشوف الدنيا)، ولما كلموني تاني اعتذرت عنه؛ لأني كان في اعتقادي أنهم هيخلوني أعمل حلقة واحدة بس، طالما حميدة هيعمل 7 حلقات».

وأضاف: «دوري عمله الفنان أحمد عبدالعزيز، وهو أخويا الكبير وكان محتاج الدور ده أكتر مني، وهو نجم كبير واشتغلت معاه أكتر من حاجة، وكان محتاجه
لأنه في الفترة دي كان صحيا تعبان شوية، وعنده مشاكل في الحياة، وقولت يمكن ربنا رتب ده عشان يعمل بيه قفزة قوية جدا، وكنت فرحان بنجاحه أوي، وعمله أحلى مني».