بيومي فؤاد: طلعت عليا إشاعة بتر رجليا.. وإسعاد يونس بتطمن عليا يوميًا
تحدث الفنان بيومي فؤاد عن تفاصيل الأزمة الصحية التي تعرض لها في الفترة الأخيرة، وذلك خلال لقاء له ببرنامج أسرار النجوم مع الإعلامية إنجي علي، عبر محطة راديو نجوم إف إم.
وقال بيومي فؤاد: طبعا فيه صداقة حقيقية في الوسط الفني وناس محترمة.. من فترة كنت اشتكيت من تعب في رجلي وضهري وأني هسافر برا عشان العلاج، وفجأة الدنيا اتقلبت، ولقيت نجوم كبار ييكلموني والمفاجأة أني لقيت نجوم كبيرة جدا من الكويت بيكلموني.
وتابع: وطلعت عليا شائعة أنه تم بتر قدمي، ولقيت وفد كويتي من أكبر النجوم هناك بيقولوا لي حجزنا الطائرة وجايين لك، وأنا للأسف مش بعرف أتعامل مع السوشيال ميديا، ويوميا بلاقي رسائل من الفنانة الكبيرة إسعاد يونس تطمن عليا.
وفي اللقاء ذاته، رد بيومي فؤاد على الاتهامات التي توجه له بسبب كثرة أعماله الفنية، فقال: أسباب الرفض لأي عمل فني 3، إني معنديش وقت أو الفلوس مش عاجباني أو العمل مش عاجبني، وللأسف الناس فاكرة أني بقبل أي حاجة، ولكن أقسم بالله ما أعتذر عنه في السنة 3 أضعاف أقدمه ولا أتباهى بهذه الكلام.
وتابع: ولكني بدافع عن نفسي قدام الجمهور، ساعات بعتذر عن حاجات مهمة جدا وأقدم أعمال بشعة، واللي بيقبل اعتذاري ببوس دماغه، والفنان الكبير عادل إمام قالي لازم لا تكون قوة اه.
وعلى صعيد آخر، أكد الفنان بيومي فؤاد على تعرض فيلم وقفة رجالة للظلم بسبب ضعف الدعايا وأمور أخرى، وذلك خلال حواره ببرنامج عرب وود المذاع على شاشة تلفزيون قناة روتانا.
وقال بيومي فؤاد: السينما احيانا كتير حاجات تظلمها برا الموجود في الفيلم، الفيلم نزل في وقت وحش، الدعاية بتاعت الفيلم كانت ضعيفة أوي، وفي وقفة رجالة أنا عملت فضايح واتخانقت مع شركة الإنتاج، وكان عزائي أني مش بطلب حاجة ليا، أنا بطلب للفيلم، لو الفيلم جايب 60 مليون، لو اهتميتوا بالدعاية هيجيب 120 مليون.
