ريهام عبد الغفور: ”تعلمت من 2022 أن مفيش حاجة دايمة وبحب اسمع بهاء سلطان”

قالت الفنانة ريهام عبد الغفور الحمد لله ربنا كرمني السنة دي بزيادة، في 3 مسلسلات "وش وضهر" و"منعطف خطر" و"الغرفة 207"، وكلهم اتصوروا على فترات متباعدة وما كنتش متخيلة إنهم هيتعرضوا ورا بعض ويعملوا النجاح ده، جاء ذلك خلال مداخلة هاتفية لبرنامج خلاص صحينا تقديم مارينا المصري على ميجا اف ام.

وأضافت ريهام عبد الغفور: “كنت قلقانة الأول وخايفة الناس تزهق لما تشوفني كتير، بس لما المسلسلات اتعرضت ورا بعض بأدوار مختلفة، عملوا رد فعل إيجابي جماهيريا ونقديا بشكل فاق توقعاتي، أنا طول الوقت بشتغل على نفسي إزاي اتغير وأقدم حاجة مختلفة، وكنت واثقة إن دوام الحال من المحال، يمكن لو كان جالى النجاح وأنا أصغر كنت اتعودت عليه وما حسش بقيمته زي دلوقتي، وفهمت ان ممكن يوم واحد يغير كل حاجة”.

تابعت:"وعن سنة 2022 عاملة زي الغرفة 207 محدش هيخرج منها زي ما دخلها، وانا خرجت منها بإنى اتعلمت إن مفيش حاجة دايمة، ومفيش ضمانات عشان كده بدعى دايما إن ربنا يغير حالنا للأحسن".

أردفت: "ومن الشخصيات المهمة اللى خرجت بيها السنة دي هى إني اشتغلت مع مخرجين مهمين كلهم فادونى واتعلمت منهم لأن كل واحد فيهم ليه مدرسته الخاصة، وطلعت كمان بزمايل كتير استمتعت بالعمل معاهم أما مسلسل "بطلوع الروح" عجبنى جدا جدا، وكنا محتاجين نشوف عالم داعش عن قرب، وأكتر موضوع شاغلنى ونفسي أسلط عليه الضوء هو إننا لازم يكون عندنا رحمة ببعض ونساعد بعض وما نقفش لبعض على الواحدة.

واختتمت قائلة:" أحيانا بتضايق من السوشيال ميديا، بس قررت إن التجاهل مفيد أحيانا، وبحب أسمع بهاء سلطان اوى، وبستمتع بكل أغانيه."