ملك أحمد زاهر تدخل المستشفى بعد أزمة صحية
تعرضت الفنانة ملك أحمد زاهر لأزمة صحية معقدة استدعت دخولها إلى أحد المستشفيات الخاصة، لتلقي العلاج اللازم.
وكشفت ملك أحمد زاهر عن الأمر بصورة نشرتها من خلال خاصية «ستوري» عبر حسابها على موقع «انستجرام».
وكتبت ملك أحمد زاهر تعليقا على صورة من المستشفى: «أنا عمري ما كنت بنزل غير الحاجات اللذيذة أو الهزار أو أي حاجة إيجابية من الأخر، ولما كنت بحب أنزل حاجة سلبية كنت باخدها بهزار أو بنزلها لصحابي المقربين، وبهزر بيني وبين صحابي».
وتابعت: «بس بجد حاسة إن الفترة الأخيرة بيجيلي تعليقات كلها ما أنتي عايشة ومبسوطة وإحنا مش عايشين وإيه كل اللي أنتوا فيه، وحاسة إن في ناس بصة على أتفه الحاجات اللي ممكن تكون عندي، أو بتبسطني زي مثلا إني أنزل أروح الجيم أو أخرج مع صحابي أو يكون شكلي حلو وأنا رايحة مناسبة معينة».
وأضافت: «حبيت أقولكم إن الحياة مش وردي أنا بقالي 3 أيام تعبانة شوية، وعندي حاجة لحد دلوقتي مش فاهمين سببها، وجت فجأة وفي حوالي نص ساعة قبلها كنت زي الفل ومن ساعتها مش عارفة أنزل أو حد يشوفني باللي أنا فيه دا ونفسيتي وحشة أوي».
وتابعت: «أنا بحكي الكلام دا بس علشان تعرفوا أن حياتي فيها الحلو والوحش زي أي حد بس أنا بحب دايما أشير الحلو وغالبا دا غلط فقررت أشارككم كمان الوحش ومع أن اللي بيحصل لي دلوقتى أنا بحمد ربنا عليه وعارفة أنه بإذن الله هيكون حاجة بسيطة بس هو مخلي نفسيتي وحشة أوي، حقيقي كل اللي طالباه إنكم متحكموش على حد من السوشيال ميديا أو من ظهوره في أي حاجه، أنها بتوري بس يمكن 20% من حياته وأدعولي أخف بسرعة».
واختتمت: «الهدف من الستوري دي مش إن أي حد يقلق لأن الحمدلله أنا كويسة، وإن شاء الله اللي عندي ده لي حل، وأنا تمام مافيش حاجة مقلقة أنا بس حسيت إني محتاجة أشارك الوحش زي ما بشارك الحلو مش أكتر».
