كندة علوش: اتعلمت مع عمرو يوسف أختار التوقيت والنبرة الصح وده منع خناقات كتير بينّا

تحدثت الفنانة كندة علوش عن علاقتها بزوجها الفنان عمرو يوسف، مشيرة إلى أن زواجهما مستمر منذ ثماني سنوات، وخلال تلك الفترة تعلّمت الكثير، وأهم ما تعلّمته هو متى وكيف تقول ما تريد.

وقالت خلال لقائها مع الإعلامية لميس الحديدي في برنامج "كلمة أخيرة" على قناة ON: "أنا بطبعي صريحة جداً، مش بس مع عمرو، لكن مع كل الناس. ولو ما قلتش اللي جوايا، بزعل وبتأثر. لكن اعترفت إن صراحتي أحياناً كانت قاسية أو فجّة، وده خلاني أندم في بعض المواقف مع الأصدقاء".

وسألتها لميس: "ممكن تعملي كده مع عمرو؟ خصوصًا إن الرجالة مش بيحبوا النصيحة"، فردّت كندة: "فعلاً، عمرو مش بيحب النُصح، بس مع الوقت فهمته، وبقيت أختار التوقيت والطريقة. لو كلمته وقت انفعاله، بخسر. وأنا بطبيعتي مش دبلوماسية، أنا برج ناري، وهو برج الحمل، ومش سياسي بطبعه".

وأضافت: "اتعلمت أأجل الكلام لحد ما يهدأ، وأقول اللي عندي بطريقة أهدى، وده مش بس مع عمرو، كمان مع أصدقائي. التوقيت والنبرة بيفرقوا جداً في تقبّل الكلام".

وعن الخلافات الزوجية، قالت إن "الخناقات كانت أكتر في بداية الجواز، لكن مع الوقت كل واحد فينا اتطبع بطبع التاني".

كما أشارت إلى اتفاق غير مُعلن بينها وبين عمرو على عدم الدخول في أي خلاف أمام أطفالهما، قائلة: "من غير ما نتكلم أو نقرّر، لقينا نفسنا متفقين تلقائياً إننا مانزعّلش الولاد أو نحطهم في موقف سلبي بسبب مشكلة ممكن تتأجل. بنختار الوقت والمكان المناسب لأي نقاش".