كندة علوش عن تجربتها مع السرطان: الكيماوي وقعلي شعري.. اشتريت باروكة وما لبستهاش

روت الفنانة كندة علوش تجربتها مع مرض السرطان، مؤكدة أنها واجهت المحنة بإيمان وهدوء داخلي لم تكن تتوقعه.

وخلال لقائها مع الإعلامية لميس الحديدي في برنامج كلمة أخيرة على قناة ON، قالت: "ربنا أنزل عليّ سكينة غريبة لما وصلت نتيجة الفحص. حتى لما الطبيبة قالت لي إنها شاكّة في حاجة مش كويسة، ما خفتش. أنا أصلاً مش من الناس اللي بتقلق على صحتها".

وأضافت: "لما اتأكدت الإصابة، تقبلت الأمر تمامًا وقلت لنفسي: ربنا كتب لي كده، وخلاص. لكن اللحظة الأصعب كانت لما عرفت إن أمي كمان مصابة، وقتها حسيت بانتكاسة خلال فترة العلاج. ومع ذلك، حاولت أعدّي المرحلة بسلاسة، وربنا اداني سلام نفسي حقيقي، من غير صدمة أو انهيار".

وتابعت عن تجربة العلاج: "وقع جزء كبير من شعري، لكن ما وقعش كله. اشتريت باروكة، بس ما لبستهاش".

وعبّرت كندة عن امتنانها لدعم لميس الحديدي، قائلة: "نصايحك كانت معايا طول الوقت، كنتِ خايفة عليّ، بس كلامك كان عملي ومباشر، وده اللي بحبه. أنا مش بحب الصعبانيات، ولما أكون في موقف صعب، بقوم نفسي بنفسي، وإنتِ ساعدتيني أعمل كده".

لترد عليها لميس بتأثر: "أنا مكنتش عاوزاكي تضعفي، كنت محتاجاكي قوية علشان تعدّي، وده كان الأهم بالنسبة لي".

واختتمت كندة حديثها برسالة مؤثرة: "من ساعتها، بقيت أعمل زيك. لما حد يمر بنفس التجربة، بكلمه بنفس الطريقة، وبحاول أكون مصدر دعم وقوة ليه".