لميس الحديدي للحكومة: فكروا في موازنة المواطن مش بس الموازنة العامة

أكدت الإعلامية لميس الحديدي أن الزيادة الأخيرة في أسعار المحروقات لها تأثيرات مباشرة وغير مباشرة على أسعار السلع وخدمات النقل، لكنها وجهت رسالة واضحة للحكومة، دعت فيها إلى مراعاة موازنة المواطن الشخصية ضمن خطط الإصلاح الاقتصادي وضبط الموازنة العامة.

وقالت خلال تقديمها برنامج "كلمة أخيرة" على شاشة ON: “وأنتم بتظبطوا الموازنة، ومع قرب الموازنة الجديدة في يوليو، اللي فيها زيادات في المرتبات والمعاشات، فكروا في موازنة المواطن الشخصية. برنامج الإصلاح الاقتصادي مهم، لكن في أبواب تانية نقدر نبدأ بيها قبل ما نروح للدعم، خصوصًا إن الدعم لا يمثل غير 11% من الاستخدامات، وده رقم ضعيف جدًا”.

وتابعت: "الاستثمار الحكومي، والإنفاق، والمديونية، كلها أرقام أكبر بكتير. أرجوكم، فكروا في المواطن وأنتم بتاخدوا القرارات. الأمور بقت صعبة جدًا".

كما وجّهت رسالة إلى التجار، قالت فيها: "بوجّه رسالة للتجار بعد مناشدة الحكومة... أنتم عارفين إن في تراجع في القوة الشرائية، بلاش تبقوا أنتم والزمن على الناس. اقفوا جنبهم، لأن لو الناس بطلت تشتري، الضرر هييجي لكم أنتم كمان".

وأضافت: "ما تفكرش كتاجر في المكسب اللحظي... فكر إنك عايز زبونك يفضل معاك، وإنك تبيع بشكل مستمر. لو هتزود، زوّد في أضيق الحدود، ولو تقدر تمتص الزيادة الأخيرة، اعمل كده... حتى لو شلت نص التكلفة، وحمّلت الناس النص التاني".

واختتمت حديثها برسالة إنسانية مؤثرة قالت فيها: "مش عايزين ركود، ومش عايزين قفزات جديدة في التضخم. إحنا عايزين اقتصاد نقدر نشم نفسنا فيه شوية".