”ميرنا وليد” تحتفل بعيد الحب بشكل مختلف
أصرت النجمة ميرنا وليد على الإحتفال بعيد الحب في هذا العام بشكل مختلف حيث شاركها الإحتفال أربعة كلاب وقطة دعوة منها إلى الرفق بالحيوان والنهي عن تعذيب المخلوقات الضعيفة.
وانتهت ميرنا وليد من جلسة التصوير الخاصة بعيد الحب وهي في منتهى السعادة.
ظهرت ميرنا وليد خلال جلسة التصوير بطقمين أحدهما كاچوال أحمر في أبيض والآخر فستان أحمر.
جلسة تصوير ميرنا وليد للمصور عمرو فارس وخبيرة التجميل رانيا عبدالله كوافير حسين علام ڤيديو جرافيك ميدو الحر.
وأعربت النجمة ميرنا وليد عن إستيائها من مابفعله بعض الناس مع الحيوانات من تعذيب وإيذاء وقالت عبر صفحتها الرسمية على موقع التواصل الإجتماعي فيسبوك : مما لا شك فيه ان ربنا سبحانه وتعالى فضل الانسان على باقي المخلوقات ولكن منظر موجع بجد لما تشوف اطفال وساعات للأسف شباب بيعذبوا حيوانات صغيره، يشوطوا كلب فبطنه يطيروه ،يمسكوا قطه من ذيلها يلفوها مروحه ويحذفوها بعيد، ألاقي بنت ٦ سنين بتضرب كلب صغير بالقلم بكل تفريغ لشحنة قساوه هي شخصيا بتتعرض لها، معرفش ايه الاحساس العجيب بالتفوق والقدره اللي بيحسوه!! بس اللي أكيد إن الرحمة ما بتتجزأش مستحيل يكونوا بيتلذذوا بعذاب كائنات ضعيفه قدامهم ويكونوا رحيمين بالناس حواليهم، ارجوكم نعلم اطفالنا الرحمه بمخلوقات الله ، الكائنات دي التقرب منها متعه لا يمكن تخيلها، حنيه كده بتغمرك، احساس ما يعرفش قيمته الا اللي مجربه، الأطفال بنربي فيها الرحمه لما بيشوفونا بنرحم،من غير اي تكلفه ماديه لو قدمت بق ميه لكلب في الشارع، بلاش حتى لو بس طبطبت عليه ،لو انت من الناس اللي بتقلق بلاش برضه بس اقلها ما تأذيهوش!!ما تسمحش لابنك او حفيدك او اخوك الصغير انه يأذيه فهمه انه بيألمه وانه روح وانه حيتحاسب عليها وانه إكرامها صدقه، لو علمته ثقافه الاحساس باللي حواليه حاتزرع الرحمه جواه ومع الوقت حايحس بيك شخصيا وبإخواته وجيرانه، ربنا سبحانه لم يخلق اي كائن عشان نعذبه هو خلق كل حاجه في الكون عشان نستمتع بيها، ف يلا نبدأ.
من ناحية أخرى قاربت النجمة ميرنا وليد على الإنتهاء من تصوير مشاهدها في فيلم الورقة الثالثة وهو إنتاج مصري فرنسي والذي من المقرر عرضه فور الإنتهاء من تصويره.
