بيومي فؤاد يرد على كاملة أبوذكري: إحنا مش بنقدم عمل فني في 3 أيام

ردّ الفنان بيومي فؤاد، على تصريحات المخرجة كاملة أبوذكري التي انتقدت فيها مسرحية زواج اصطناعي التي عرضت خلال موسم الرياض بقولها إن العمل تم التجهيز له في ثلاثة أيام فقط.

وقال فؤاد خلال مقابلة مع برنامج «حبر سري» الذي تُقدمه الإعلامية أسما إبراهيم، على شاشة «القاهرة والناس»، وعُرضت مساء الخميس، إن بروفات المسرحية استغرقت أكثر من شهر، كما أن كتابتها استغرقت أكثر من ثلاثة أشهر.

وأضاف: «إحنا مش بنروح بحاجات 3 أيام.. إحنا سفراء لبلدنا بيحبونا وبيحترمونا وبيقدرونا.. لو كايدكم أو غايظكم أو مضايقكم همَّ بيحبونا كده».

وتابع: «الكلام ده غايظ اللي بيشتمنا أو بيدّعي علينا ادعاءات والمفروض إنه مثقف وفاهم وحاجات كتير».

وكانت المخرجة كاملة أبوذكري قد صرحت في وقت سابق عبر موقع «فيسبوك»: «الأستاذ الفنان اللي كنت واحدة من محبيه، لو حضرتك فاكر إنك لما تعمل عمل اتحضر واتكتب واتنفذ في تلات أيام، وتروح تعرضه وترقص وتغني وتضحك، وبعد كده تآخد آلاف الدولارات، لو ده بتسميه فن فأنا لا يشرفني إني أكون زميلة لك في هذه المهنة».

وأضافت: «ولما تكون بتعرض التفاهات دي ده لا يشرف الفن المصري، ولما تعرض التفاهة دي وجارك بيدبحوا أطفاله ونساءه، ورجاله وتقولي الفن، يبقي ما عنديش كلام أقدر أقوله غير إن الإحساس والفن نعمة أنتم آخر ناس تتكلموا عنها».