أميرة عبيد تفتح ملف محاربة الإدمان.. وتؤكد: المجتمع في أمسّ الحاجة لمواجهته
فتحت الإعلامية أميرة عبيد، ملف محاربة الإدمان، مؤكدة أن المجتمع في أمس الحاجة لتصدي الإعلام بأكمله لمحاربة الإدمان، مضيفة: كام أم بتنهار يومياً بسبب ابنها المدمن وكام من مجرم سبب اجرامه الإدمان وكام من قاتل سبب جريمته الإدمان؟
وأضافت أميرة عبيد خلال تقديمها برنامج "هي وهما" على قناة الحدث اليوم، القصاص هيكون حليف كل مجرم.. وهنا أنا بطالب من السادة أعضاء مجلس النواب أنهم يتقدموا بطلب إحاطة لعمل قانون يجرم و يشدد العقوبة علي المدمنين، لأن الإدمان ليس مرض.. ودي وجهة نظري اللي أنا حرة فيها".
تابعت، المدمن لا يقل خطورة وإجراما عن الديلر أو تاجر المخدرات ، كلهم أبالسة وشياطيين، وخطر علي المجتمع والناس.. بدليل مفيش بيت فيه مدمن إلا والخوف والقلق مسيطر على أهله، معظم قضايا السرقة والقتل اللي بتحصل في المجتمع وراها مدمنين !!.. محدش يقولي الإدمان مرض لا.. مريض الحقد والأنانية والسادية هو اللي يقدر يتعاطي المخدرات ويتحول لمدمن، مفيش انسان بيحب ربنا ونضيف من جواه هيسمم نفسة ويضر اللي حواليه مفيش إنسان مسؤول بيحب أبوه وأمه ومراته وعياله ممكن في يوم يبقي مدمن، ميعملش كده غير المستهتر اللي عمره ما عرف الحب ولا الدين ميعملش كده غير الإنسان السادي اللي بيتلذذ بعذاب أهله عليه ومنه في نفس الوقت ".
