الفنان وائل علاء يكشف عن تجربة قاسية في بداياته
تحدث الفنان وائل علاء، عن تفاصيل بداياته الفنية، موضحًا أن والده كان أول الداعمين له بعدما اكتشف موهبته في التمثيل، وتفاصيل مشاركته في ستاند آب كوميدي، بجانب الكشف عن تفاصيل تعرضه للنصب من أحد المنتجين.
وقال وائل علاء، خلال حواره في برنامج "من غير نفسنة"، الذي تقدمه الفنانة انتصار وبدرية طلبة ونوليا، عبر شاشة قناة "هي": والدي الله يرحمه كان بيحب الفن جدًا وكان مهندس ديكور لمسرحيات كتير جدًا للأستاذ جلال الشرقاوي، وأنا كنت بروح معاه التصوير وأنا صغير، وبدأت أشوف المسرح والناس والكواليس، وبدأت في ثانوية عامة كنت بقلد شرايط المسرحيات.
وتابع وائل علاء، كاشفًا عن تأليفه عددا من الأفلام ومشروع فيلم كارتون، قائلًا: أكاد أزعم إني كنت شاطر في السكة دي واشتغلت فيها وظبطت الدنيا إنتاجيًا، ولكن الموقف اللي حصل في الفيلم بتاعي هو اللي خلاني أوقف، لأن اتنصب عليا من المنتج، بعد ما عملت كل حاجة وكسب يعني لو كان دافع جنيه كسبه 5، وأنا مستفدتش أي حاجة غير فنيًا إني عملت شغلي.
وأضاف: كله مستسهل الموضوع، وبيجيبوا الناس اللي أجرها أقل، ولكن لما حد بيكون عنده استعداد أنه يعمل فيلم حلو طبعًا بوافق وبموت نفسي علشان يخرج بالمستوى.
واستكمل: فكرة إني أعمل الحدوتة وأكون جوا المطبخ دي قصة كبيرة، واكتشفت بعد فترة كبيرة أن التمثيل أكثر متعة، علشان أقدر أركز، ووصلت لدرجة أني بكون بمثل مشهد وبهتم أن الناس تقول وأنا مش مهم، ولاقيت نفسي بنزل، طيب ليه ما أركز وخلاص.
أما عن تجربته في ستاند اب كوميدي، فعلق وائل علاء قائلًا: ستاند اب كوميدي دي كانت حدوتي في حياتي كلها، وكان عندي حلم من زمان أني أكون واقف على المسرح أتكلم بكل الشخصيات وحاربت علشان يحصل والحمد لله اتحقق، ده فن أنا بحبه وقائم على الارتجال.
"من غير نفسنة" برنامج نسائي ساخر يقدمه كل من الفنانة انتصار وبدرية طلبة ونوليا، يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عدد من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.
