هندية: السويدي عمل معايا نفس اللي عمله مع حنان ترك.. «بس مسامحاه»
حلت الفنانة المعتزلة هندية ضيفة على الإعلامية إنجي هشام في برنامج «المنسي» عبر قناة «هي».
وتحدثت هندية عن أسباب اعتزالها الفن، موضحة: «أستاذ وحيد حامد لما عرف قالي إنتي مجنونة، حد يعمل اللي انتي بتقوليه ده، قلتله أخويا توفي قدام عيني، قالي كلنا هنموت».
وواصلت هندية كلامها: «الصدمة كانت أكبر مني وقلت ممكن أموت في لحظة أنا كمان، وأستاذ وحيد حامد اتصل بيا عشان أنزل اروح فرح دينا وقالي بلاش عبط وأول ما قابلوني قالولي إيه ده، مكنتش قادرة أبررلهم».
وأضافت هندية: «قعدت في البيت 12 سنة معظم وقتي صلاة وعبادة، عملت 11 عمرة غير الحج وتسبيح وقراءة قرآن، وكنت في وسط أخواتي وبعد ما اعتزلت ولاد اخواتي قالولي عاوزين ندخل الفن قاتلهم انتوا كنتوا رافضين أنا ادخل وقلتلهم ستوب لأن الفن في مخاطر كتير جدا».
كما تحدثت هندية خلال الحلقة عن حلم الأمومة، قائلة: «تزوجت من أيمن السويدي وحملت مرتين وأجهضني وقالي مش عاوز أطفال وأنا زعلت وقلت يمكن عشان رقاصة، طلع أنه عمل كده في حنان ترك وأكتر من حد ومش عاوز أولاد وقالي هموت وأنا صغير، سمعت كلامه وسقطت مرتين ولكن بحبه جدا ومسامحاه كمان».
واستكملت كلامها: «أنا كنت عايزة ابقى أم وهو حرمني لكن في الآخر بقول القرار كان قرار مين ربنا ولا البني آدم، هزعل من ربنا ولا منه هو؟ وبعد ما انفصلت عنه قالي ليه سمعتي كلامي؟ قلتله كرامتي وجعتني».
