عمرو مصطفى: نفسيتي بايظة.. والمطربين بيغنوا الأغاني بتاعتي من غير ما يقولوا اسمي

قال المطرب عمرو مصطفى، إن التطور التكنولوجي الحالي يدمر نفسه بنفسه.

وأضاف: "النهاردة تقدر تسجل لحد والتسجيل ممكن يتسرب، دلوقتي تقدر تقول دا مش صوتي دا ذكاء اصطناعي، مفيش حاجة تصدقها غير اللي تشوفها وتسمعها قدامك".

وتابع "مصطفى"، في لقائه ببرنامج "التاسعة"، عبر القناة الأولى المصرية: "الموسيقى وثقافتنا تتدمر يوم بعد يوم ومشروع إحياء أغاني التراث و مشروع عندي من قبل كورونا 3 سنين بحضر في المشروع".

وأكمل: "الذكاء البشري اقوى من الاصطناعي الف مرة، والمهرجانات مفيش حد قادر يسيطر عليها، والقنوات مش بتكتب أغاني من ألحان عمرو مصطفى، وحقي الأدبي بيدمر انا مش عارف اشتغل ونفسيتي بايظة ومطربين بيغنوا الأغاني بتاعتي من غير ما حد بيقول اسمي".

وتابع: "المطرب لو طلع غنى في حفلة ومقلش اسمي يبقى دا عيب يقولك لا مش عيب، طيب انا لو اخدت صوتك دا برضة مش عيب، هتستبيح حقي الأدبي هستبيح حقك الادبي، تقول اسمي اقول اسمك، مفيش اي حقوق ملكية فكرية لبصمة الصوت في اي مكان في العالم".

وشدد عمرو مصطفى أنه يسعى للحصول على تعويض بسبب حقوقهم الملكية لألحانهم التي استخدمتها المهرجانات، مشيرا إلى أنه سيتبرع بتلك التعويضات لتحيا مصر، متابعا:"أريد تعويضا عن الأعمال التي استخدمت ألحانى ومن بينها المهرجانات".