النائب سيف زاهر ينتقد ظاهرة المراهنات الرياضية: اليوم يبيع اللاعب نادي وغدا سيبيع بلده

قال النائب سيف زاهر وكيل لجنة الشباب بمجلس الشيوخ،: لابد من حملة توعية كبيرة ولابد من قانون كبير جداً وقانون قوي يجرم هذه المسألة، لأن اليوم اللاعب يبيع نادي، ويبيع حريته، غدا سيبيع بلده، فهذه هي المشكلة وهذه هي الخطورة.

وأضاف أنه بالنسبة لمراكز الشباب، "أعتقد إن إحنا لو عملنا 75 جلسة وقعدنا 10 سنين نتكلم مش هنلاقي حلول، لأن بمنتهى الصراحة الدولة في القصة دي عاملة اللي عليها، 4500 منشأة، ميزانية ضخمة جداً، لا يمكن يكون الحل إن الدولة هي اللي تبني".

وتابع،: "وزير الشباب والرياضة السابق ووزير الشباب والرياضة الحالي، ولهما كل التحية، عارفين الكلام اللي أنا بقوله، وزير الشباب والرياضة كابتن جوهر نبيل عارف الكلام ده، عارف إن أنت مستحيل تعمل كل مراكز الشباب دي بدون دخول القطاع الخاص، بدون وجود B.O.T نظام يجعل القطاع الخاص يدخل بدون ما يكون في تحميل على المواطن، ويكون هناك سيستم تسويق مختلف".

وزاد: "أنا بقول إن الجلسة دي هنقعد فيها السنة الجاية واللي بعديها واللي بعديها، فأعتقد إن هو ده الحل إن إحنا نفكر بره الصندوق، كفاية إن إحنا نعمل ضغط على الدولة في مبالغ من الصعب جداً إن إحنا نوفرها".

وأكمل: "في لجنة الشباب والرياضة كان في طلب مناقشة من نائب زميل بيناقش سور بقاله 10 سنين بيطالب بيه، الراجل قاعد أهه، سور مركز شباب بقاله 10 سنين بيطالب إنه يتبني، في حضرتك مراكز شباب أوضة وصالة عشان تدي صوت في الانتخابات، كل اللي بقوله ده كل النواب عايشينه وكل الناس عارفينه".

وأضاف: "الملف ده كله محتاج يتبص عليه نظرة تانية، ما يصحش أو ما ينفعش إنها تكون موجودة لأن معندهاش حاجة مفيش إمكانيات، وفي المحافظات لن ينصلح الحال بدون دخول القطاع الخاص أو بتسويق مراكز الشباب بالشكل المجتمعي، في شركات خاصة تتمنى إن يكون في دور مجتمعي ليها في هذا الشأن".