ماتت مظلومة| أبناء ضحية العامرية يطالبون بالقصاص العاجل لوالدتهم
قال أبناء ضحية جريمة العامرية بمحافظة الإسكندرية، في حديث مؤثر، إن والدتهم "ماتت مظلومة"، مؤكدين أنهم لن يهدأ لهم بال حتى يتم القصاص العادل من الجناة الذين غدروا بامرأة لم تعرف سوى الطيبة والرحمة طوال حياتها.
روت مني عباس، ابنة المجني عليها، خلال مشاركتها في برنامج "هي وهما" الذي تقدمه الإعلامية أميرة عبيد على قناة الحدث اليوم، تفاصيل الساعات الأخيرة قبل الحادث، قائلة: "أمي كانت ست بسيطة وطيبة، كل حياتها بين بيتها والمحل الصغير اللي فتحته علشان تقتل وحدتها بعد ما كبرنا.. ما كانتش بتأذي حد، وكانت دايمًا تفرّق الخير والضحكة على كل الجيران، حتى اللي أذاها كانت تدعيله بالهداية."
وأضافت: "القاتلة كانت تعتبرها زي أمها.. بتدخل بيتها وتأكل وتشرب معاها، لكن للأسف خانت الأمانة وطعنتها في قلبها قبل ما تخنقها بإيديها."
من جانبه، قال أحمد عباس، نجل الضحية: "أنا كنت قريب منها جدًا، البيت بتاعنا فوق بيتها، وعمري ما كنت أتخيل إن في يوم من الأيام أسمع إن أمي اتقتلت على إيد جارتها. كنت دايمًا بقول لها تعالي عيشي معايا، بس كانت تقول لي: أنا مبسوطة في بيتي ومع الناس اللي عرفاهم."
وتابع قائلًا: "القاتل كان بيلف حوالين البيت أيام قبل الجريمة، محدش شك فيه، ولا حتى أنا. لما رجعت من شغلي لقيت الباب مقفول، والكارثة حصلت."
وأكد الأبناء أنهم يثقون في العدالة المصرية وفي سرعة القصاص، معبّرين عن امتنانهم لأجهزة الأمن التي كشفت الجريمة في وقت قياسي، قائلين: "إحنا واثقين إن حق أمي هيرجع، وإن المجرمين هيتحاسبوا على كل لحظة وجع سببوها لنا."
واختتمت مني عباس حديثها قائلة: "أمي ماتت مظلومة.. بس روحها هتفضل مرتاحة يوم ما نشوف القتلة بيتحاسبوا، والعدالة بتتحقق في بلدنا اللي عمرها ما بتسيب حق مظلوم."
