ياسمين غيث بأول ظهور بعد جراحة إزالة الورم: ”ادعوا لي أرجع أعيش من غير ألم تاني”
كشفت الفنانة ياسمين غيث تطورات حالتها الصحية بعد الخضوع لجراحة عاجلة وصعبة لإزالة ورم، تبين لاحقاً أنه حميد، ولكنه أضاف لأزماتها الصحية مشكلة جديدة بعدما أكدت الفحوصات وجود أزمة في الغدة الدرقية تستلزم الفحص الدوري، إضافة للفحص الخاص بالأورام السرطانية.
ونشرت ياسمين غيث عبر حسابها الرسمي على انستغرام عدة صور تظهر فتحة طولية في عظام القفص الصدري، وشرحت تطورات حالتها الصحية في التعليق بقولها: عارفة إنكم قلقانين عليا ومش عايزة اتأخر عليكم أكتر من كدة رغم تعبي لسة..مبدئياً ده شكلي معظم ال ٥ شهور اللي فاتوا...من شهر ١١ حتى الآن... الحمد عملت العملية يوم ٦/٢ (عملية open chest لإزالة ورم حجمه ٨ سم+).. الحمد لله ألف حمد وشكر طلع حميد وطلع إنه كتلة من الغدة الدرقية وده هيحتاج إني أعمل فحوصات و check up علي الغدة كل ٣ شهور، ده طبعا غير ال general check up اللي بعمله كل ٦ شهور. الحمد لله علي كل حاجة.
تابعت قائلة: عاملة إيه؟ تعبانة...حاسة بإيه؟ ألم لا يحتمل...في عضمي، في ضلوعي، في أعصابي...بس كدة؟ لأ...العملية مكانها صعب والفتح في عضم الصدر المه مش طبيعي، بس أي إنسان عادي بيحس بالألم ده بطريقة معينة لكن أنا إيه اللي بيحصل معايا؟ أنا من ٧ سنين عملت عملية ال breast cancer اللي شالوا فيها من صدري اليمين جزء من العضلة، و معظم الغدد (lymph nodes) اللي تحت الذراع و ده أثر من وقتها على ذراعي اليمين و فضل كذا شهر بيوجعني و بعد كدة كمّل معايا التنميل و الوجع بس محتمل.
وواصلت ياسمين غيث الحديث عن وضعها الصحي بقولها: بعد العملية الأخيرة، فهمت إن الفتح في نص القفص الصدري والقطع في العضلة دي والعضم والأعصاب، بيأثر علي الذراعين، لأن معظم قوة حركتهم بتكون من عضلة الصدر. فضلت حوالي إسبوعين مش عارفة أستخدم إديا الإتنين خالص، شوية بشوية مع العلاج الطبيعي بقيت عارفة أستخدم الشمال في حاجات بسيطة و اليمين برده لأ و الألم في ضلوعي و دراعي و كتفي و رقبتي اليمين غير محتمل لدرجة إن الدكاترة بيدوني مسكنات جدول لازم يدوهالي من المستشفي...لغاية ما الدكاترة قالولي للأسف نصك اليمين بدراعك اليمين هيكون متأثر أكتر بسبب عملية الbreast cancer القديمة اللي أصلا سايبة أثر علي ذراعك فمعلش مافيش حل غير إنك تستحملي و تاخدي مسكنات للألم و علاج طبيعي لغاية ما يرجعلك ال range of motion و الإحساس تاني بنسبة كبيرة. الحمد لله علي كل حاجة، بس قلت أحكلكم كدة و ده ملخص لتفاصيل كتييييير قوي صدقوني منها إني بيغمي عليا من الوجع و غيره.
4 عمليات في 5 شهور
أضافت: أنا مش بحب أحط صور كدة بس حبيت أعرفكم المرة دي أنا في إيه و بعدي بإيه و شكلي عامل إزاي حاليا و الجرح شكله إيه علشان ماتتخضوش لما تشوفوني لأن أنا من كتر وجع الجرح كمان و الirritation اللي فيه مش بستحمل هدوم عليه فحتي في عز البرد بكون مش حاطة أي هدوم عليه علشان مش بستحمل. فماتخافوش من شكله.
واختتمت ياسمين غيث رسالتها بطلب الدعاء قائلة: إدعولي أرجع زي الأول، أنا بقالي ٥ شهور عملت فيهم ٤ عمليات بين المستشفيات والعناية المركزة والدكاترة والفحوصات وأوجاع لا تحتمل والله، إدعولي علي الأقل أرجع أعيش من غير ألم تاني. أنا الحمد لله بتحسن بالعلاج الطبيعي بس ببطأ شوية.
