شبيهة الفنانة سماح أنور: المخرجين استغلوني واعتبروني سبوبة مش موهبة

فتحت صفاء أنور، المعروفة بلقب "شبيهة الفنانة سماح أنور"، قلبها لتروي جانبًا من معاناتها في الوسط الفني، مؤكدة أنها تعرضت للاستغلال على يد عدد من المخرجين والمنتجين الذين لم ينظروا لموهبتها، بل تعاملوا معها على أنها "سبوبة" فقط.

وقالت صفاء خلال مشاركتها في برنامج "هي وهما" الذي تقدمه الإعلامية أميرة عبيد على قناة الحدث اليوم، : "دخلت المجال الفني وقلبي مليان شغف، لكن للأسف اتعاملت مع ناس شافتني مصدر ربح مش فنانة عندها حلم صورت فيديو كليب اسمه أنا بنت بـ100 راجل، وبعت عربيتي علشان أقدر أنتجه وأنطلق بيه، لكن اللي حصل إنهم خدوا الفلوس وما عملوش حاجة محترمة."

وأضافت: "ماكنش فيه احترام للتجربة، ولا رغبة في تقديم حاجة فنية بجد. حسيت وقتها إني مجرد مشروع كسب، ولما المشروع فشل، محدش وقف جنبي ولا حتى رجع لي فلوسي."

وتابعت: "أنا دخلت الفن علشان أثبت نفسي، مش علشان أكون ضحية طمع البعض. ما طلبتش معاملة خاصة، كل اللي كنت عايزاه فرصة حقيقية أظهر فيها موهبتي. لكن اللي حصل إنهم اعتبروني مجرد شبيهة لفنانة معروفة، وده كل اللي كانوا شايفينه."

وأكدت صفاء أنها لا تزال تحلم بفرصة عادلة، وتابعت: "لو جالي عرض محترم من مخرج يقدر الموهبة مش الشكل، أكيد هكون موجودة. أنا مش نسخة من حد، أنا صفاء أنور، عندي شخصيتي وموهبتي، ومش هستسلم."

وختمت حديثها برسالة مؤثرة: "نفسي الوسط الفني يبص للمواهب الجديدة بجد، ويدّي فرصة للي عنده حلم وإصرار لأن اللي حصل لي ما يتمناهوش حد."