آية سماحة عن ارتباطها بالمنتج محمد السباعي: كان ضد الزواج.. وأنا اللي اتجوزته
أشادت الفنانة آية سماحة، بزوجها المنتج محمد السباعي، مؤكدة أن «تربيته العالية» كانت أول ما جذبها إليه، قائلة: «أول شيء حبيته فيه هو تربيته؛ فهو شخص متربي أوي، وواضح جدًا، ولم أر أحدا يتعامل مع الناس بهذا الاحترام، شخصية محترمة جدًا».
واعتبرت خلال استضافتها في برنامج «أسرار» مع الإعلامية أميرة بدر عبر شاشة «النهار»، أن الرجل غير المهذب «ناقص رجولة»، قائلة:«الراجل اللي مش متربي ناقصه رجولة».
وردت على سؤال حول مواصفات الرجل «غير المتربي» في تعامله مع المرأة من وجهة نظرها، قائلة: «الرجل اللي مش متربي، مش بيقدر الست، وشايف أن مكانها المطبخ وأنها قليلة متعرفش تعمل حاجة، وأنه يقدر يمد يده عليها وهي أضعف منه».
ورأت أن هذه النظرة تشمل كل النساء في حياته سواء كانت أما أو أختا؛ وليس زوجته فحسب، معلقة: «أنا مقدرش أحب واحد مش متربي، أنا مش هاجي أعالجك، أنا عايزة حد متربي يشاركني حياتي، ولقيته في سباعي، قلت له هتجوزك يعني هتجوزك، كان تارجت بالنسبالي وواحد هتجوزه مش واحد هنبقى أصحاب، يعني أنا اللي اتجوزته».
وأوضحت أنهما تعرفا عن طريق أصدقاء مشتركين بعد إعجاب متبادل «من بعيد لبعيد»، وكانا صريحين منذ البداية حول طبيعة العلاقة بينهما.
واعترفت بأن زوجها كان رافضا لفكرة الزواج تماما ولا يريد تحمل المسئولية؛ لكنها أقنعته قائلة: «كان ضد الجواز جدًا، مش عايز يتجوز خالص ولا عايز مسئولية، قلت له إحنا الاثنين سنتحمل المسئولية مع بعض، هي مش حرب، وأنا مش عايزة حد يتحمل مسئوليتي؛ لكن عايزة حد يشاركني رحلتي في الحياة وإحنا أصحاب».
