محمد شاهين: أول عمل ليا كنت 22 سنة وأجري كان 750 جنيها
كشف الفنان محمد شاهين عن الكثير من الأرقام في حياته، وذلك خلال لقائه في برنامج "أرقام" مع إيناس سلامة الشواف على راديو إنرجي 92.1.
وقال شاهين: "إن العمر غير مرتبط برقم ولا النضج، فأنا ضد فكرة ربط الأهداف برقم العمر"، متابعا "يعني أنا دلوقتي 45 سنة المفروض أعمل إيه يناسب سني؟"، وأردف: "بحب رقم 13 جدا من صغري وبعتبره رقم حظي لأنه مرتبط بحاجات حلوة".
وعن أرقام المشاهدات والإيرادات، قال: "حلم أي فنان إن العمل اللي بيقدمه يكون كامل العدد داخل المسرح أو قاعة السينما والناس تتفرج عليه، وبأشعر بالفرح بأرقام المشاهدة لأنها نفس فكرة كامل العدد".
وواصل حديثه، "رقم التريند بعرفه من الناس لكن مش بهتم بيه وعادة لما بيحصل بكون لسه بصور، الإيرادات بتفرحني لأن ده معناه مكسب للإنتاج بيكسب في شغل تعب فيه ودفع فيه فلوس".
وعن ترتيب الأسامي والأجور بين النجوم، قال: "عمري ما كان فارقلي فكرة رقم الأجر العالي، مش هنكر إن رقم ترتيب اسمي على الأفيش بيفرحني وهو متقدم بس في الآخر الناس مش بتتفرج على التتر المهم الدور تأثيره إيه".
وقال محمد شاهين، إنه لا يمتلك أي حسابات على فيسبوك، ولكن يمتلك على انستجرام فقط ويتابع من خلاله ردود الفعل على أي عمل يقدمه.
وبسؤاله عن أول أجر، قال: "أول عمل ليا كنت 22 سنة وأجري كان 750 جنيها، ومن حظي إني اشتركت في أعمال سعيد بتقديمها مثل "ونوس"، "الزيبق"، "السبع وصايا"، "نيران صديقة"، "بين السرايات" وغيرها.
