الصور مش بتزيد.. حسام داغر يرثى والدته بكلمات مؤثرة فى ذكراها الخامسة

نشر الفنان حسام داغر تعليقا عبر حسابه على موقع التواصل الاجتماعى “إنستجرام” يرثى فيه والدته بكلمات مؤثرة.

وقال حسام داغر: “النهارده الذكري السنوية الخامسة لوفاة والدتي ست الكل حبيبتي.. ببص على ملف الصور بتاعتنا سوا على موبايلي لقيتني بشوف نفس الصور هي هي من 5 سنين.. طبيعي لأن الصور مش بتزيد من وقتها والملف هو هو”.

حسام داغر يرثى والدته

وأضاف حسام داغر: “قربت أحفظ كل الصور من كتر ما بتفرج عليها وبشوف ماما حبيبتي لما كانت لسه معايا وحواليا و بحكيلها كل حاجة وبشوف ذكرياتنا سوا في كل مكان رحناه سوا.. بس للأسف الصور مبتزيدش.. لأنها راحت خلاص.. لو كنت أعرف كنت اتصورت معاكي أكتر كتير وصورتك فيديوهات وانتي بتحكي معايا وتنصحيني”.

وأوضح: “كنت صورتك وانتي بتضحكيني و تضحكي من كلامي.. كنت صورت ضحكتك وطيبتك اللي الناس كلها كانت عارفاها علشان اللي ملحقش يعرفك على الأقل يشوف روحك من الفيديوهات دي وانتي بتتكلمي وتضحكي وتهزري مع صحابي زي عادتك”.