ضهري وسندي.. إيناس مكي تنفي شائعات خلافها مع شقيقها

أكدت الفنانة إيناس مكي أن الشائعات التي تتحدث عن وجود خلافات بينها وبين شقيقها النجم أحمد مكي غير صحيحة تمامًا.

وقالت في تصريحاتها ببرنامج قعدة ستات الذي تقدمه مروة صبري: “إشاعة إن فيه خناقة، وإن فيه بينا مشاكل الكلام ده مش مظبوط، يا أخوانا هو ضهري هو سندي هو أخويا، وأخويا مش مجبر أنه يشغلني، والناس بتفكر أن طالما كده يبقى فيه خناقة واحنا منطق الوساطة ده مش عندنا والله، ومش عارفة إذا كان ده عند كل الناس أو لأ، بس إحنا بطبيعتنا إن أنا مبتعداش حتة في حياته، وهو ميتعداش حتة في حياتي، والفكرة مش أنا وهو بس، إحنا الـ 5 إخوات كده”.

وأشارت إلى أنها واجهت من قبل شائعة تتهمها في شرفها قائلة: “زمان كان طلع عليا إشاعة أنا ومجموعة من الفنانات، إني مرفوع عليا قضية، ودا كلام أنا مقبلتش بيه لأنه يمس الشرف والسمعة، وفيه شخص بعتلي وقالي أنا متأكد إن انتي ودي مش إشاعة، ورديت عليه قلتله القضاء ما بينا ورفعت عليه قضية”.

أما عن وفاة والدتها وتأثيرها عليها نفسيًا، فقد تحدثت إيناس بحزن شديد قائلة: “أنا مش متزنة نفسيًا بعد موت أمي، وجات فترة كنت ما بعرفش أنام، وباقوم مفزوعة ومن كتر عياطي عيني تعبت، أنا عيطت الفترة اللي فاتت كتير جدًا، وحزينة جدا على وفاتها، لما كان حد بيسأل ماما عن حاجة تقوله أنا مليش دعوة، هسأل مامتي كان قصدها عليا أنا وفي آخر تسع سنين في حياتها كنت بعتبرها بنتي مش أمي، موتها كسرني ومفيش فترة كنت بعيدة عنها وكنا جنب بعض علطول”

واستكملت إيناس مكي أنها النسخة الأقرب لوالدتها من حيث الشكل والصوت وأنه بالرغم أن لديها 5 أشقاء لكن هى الأقرب لوالدتها.