ميرنا وليد تدشن حملة للرفق بالحيوان في عيد الحب.. ما القصة؟
أطلقت الفنانة ميرنا وليد دعوة للاحتفال بيوم الحب، الذي يوافق اليوم 14 فبراير، بشكل مختلف هذا العام، حيث خضعت لجلسة تصوير مع المصور عمرو فارس، وبمشاركة 4 كلاب من الحجم الصغير؛ لتدشين حملة للرفق بالحيوان، خاصة كلاب وقطط الشوارع.
ميرنا أطلقت الحملة عبر حسابها الشخصي على موقع الفيس بوك، وقالت في بيان مطول: "مما لا شك فيه أن ربنا سبحانه وتعالى فضل الإنسان على باقي المخلوقات، ولكن منظر موجع بجد لما تشوف أطفال وساعات للأسف شباب بيعذبوا حيوانات صغيرة، يشوطوا كلب في بطنه يطيروه، يمسكوا قطة من ذيلها يلفوها مروحة ويحدفوها بعيد".
تابعت قائلة: "ألاقي بنت ٦ سنين بتضرب كلب صغير بالقلم بكل تفريغ لشحنة قساوة هي شخصياً بتتعرض لها، معرفش إيه الإحساس العجيب بالتفوق والقدرة اللي بيحسوه!!".
وواصلت قائلة: "بس اللي أكيد إن الرحمة ما بتتجزأش مستحيل يكونوا بيتلذذوا بعذاب كائنات ضعيفة قدامهم ويكونوا رحيمين بالناس حواليهم، أرجوكم نعلم أطفالنا الرحمة بمخلوقات الله، الكائنات دي التقرب منها متعة لا يمكن تخيلها، حنية كده بتغمرك، إحساس ما يعرفش قيمته إلا اللي مجربه".
وتابعت ميرنا وليد: "الأطفال بنربي فيها الرحمة لما بيشوفونا بنرحم، من غير أي تكلفة مادية لو قدمت بُق ميه لكلب في الشارع، بلاش حتى لو بس طبطبت عليه، لو أنت من الناس اللي بتقلق بلاش برضه بس أقلها ما تئذيهوش!! ما تسمحش لابنك أو حفيدك أو أخوك الصغير إنه يؤذيه.. فهّمه إنه بيؤلمه وإنه روح وإنه حيتحاسب عليها وإنه إكرامها صدقة، لو علمته ثقافة الإحساس باللي حواليه حاتزرع الرحمة جواه، ومع الوقت حايحس بيك شخصياً وبإخواته وجيرانه".
واختتمت قائلة: "ربنا سبحانه لم يخلق أي كائن عشان نعذبه.. هو خلق كل حاجة في الكون عشان نستمتع بيها، فيلا نبدأ".
وكشف المصور عمرو فارس تعليقاً على جلسة التصوير الجديدة، مؤكداً أنه التعاون الخامس له على التوالي مع ميرنا وليد للاحتفال بيوم الحب، وأكد أن الرغبة هذا العام كانت في تقديم فكرة جديدة ومختلفة.
