جميلة عوض تتصدر تريند جوجل بعد ظهورها في برنامج ”صاحبة السعادة”
تصدرت الفنانة الشابة جميلة عوض، تريند جوجل بعد ظهورها مع الإعلامية إسعاد يونس في برنامجها التليفزيوني "صاحبة السعادة" حيث كشفت عن كواليس تعرفها وزواجها على المونتير أحمد حافظ وظهور عائلتها في حلقة حملت اسم "ليلة في حب محمد عوض".
جميلة عوض تكشف عن تفاصيل علاقتها بزوجها أحمد حافظ
كشفت الفنانة جميلة عوض عن تفاصيل علاقتها بزوجها أحمد حافظ، وقالت: "وقت كورونا كان معجب بيا بس ما عندوش وقت يركز معايا، مثلا يكلمني كل أسبوعين ويسألني عن الشغل أو مهرجان أنا فيه، أو يقترح نعمل خروجة، فأقول له شوف فلان وفلان، وفي دماغي إني مش عايزة اديله إرسال غلط".
وتابعت: "وقت كورونا ابتدى يكلمني بشكل دائم، وأنا ابتديت أحس بالتعلق، وابتدى يقلّي بحبك و إديني فرصة أكون موجود في حياتك، وعادي لو مش عايزة إديني يومين وهنرجع أصحاب عادي".
وأضافت عوض: "كان بيعدي وقت وأقول أكيد هيفيص مني ويقول مش قادر على موضوع الصداقة، لكن لقيته موجود وموريني اهتمامه، وفي نفس الوقت رزين في نفسه، ولما عدت سنة من غير ما يشتكي فعلاً تعلقت به كصديق.. لقيته بيتعامل بنضج ومن غير ابتزاز وبطريقة صحية، وده حسسني بأمان جداً، وخلاني أبص له بشكل مختلف وتعلق أكتر".
"ليلة في حب محمد عوض".. إسعاد يونس تستضيف عائلة محمد عوض
تطرقت عائلة محمد عوض في الحديث عنه خلال الجزء الثاني من حلقة "صاحبة السعادة"، حيث قال عاطف عوض مصمم الرقصات: "لما كنت بسمع صوت فتح باب البيت، بعرف أن والدي وصل، وفجأة البيت كله يهدى، لأن في غيابه طول اليوم، بنلعب بصوت عالٍ، لكن وهو في البيت الكل بيسكت، يعني بمجرد ما نسمع تكة مفتاح الباب، البيت كله يبقى صامت".
وأضاف: "والدتي كانت هي اللي تفرض النظام ده علينا في البيت، احتراما لطقوس والدي وتقديرًا لأنه طول اليوم في الشغل، ماما كانت توقفنا إحنا التلاتة قدام الأسانسير لغاية ما هو ينزل لتحت، وأول ما يخرج ونستنى شوية والباب يتقفل، الصوت والحركة تشتغل في البيت".
وبجانبه، أكد المخرج عادل عوض: "اكتشفنا إن في كل البيوت الأمهات بتخوف ببابا، كنا أنا وعاطف أشقياء وعلاء كان هادي جدًا". وعقب علاء عوض على كلام شقيقه وقال: "بعد ما وصلت لـ 15 سنة والباليه، بقيت شقي".
عادل عوض: جميلة عوض هي الوحيدة اللي كان مسموح لها تعمل دوشة في البيت
تحدث المخرج عادل عوض عن علاقته والده مع حفيدته جميلة عوض، وقال: "بابا كان بيحب جميلة جدًا، حبا غير طبيعي، وكان يوفر لها كل ما تحتاج إليه، وكان يحاول دائمًا أن يأتي إلى المنزل في وقت مبكر حتى يلعب معها قبل أن تذهب إلى النوم".
وأردف: "جميلة عوض هي الوحيدة اللي كان مسموح لها تعمل دوشة في البيت، وتلعب براحتها مع جدها محمد عوض، ولم يحب شخصًا أكثر منها".
