روحت مشي من الفرحة.. عمرو عبدالعزيز يكشف كواليس أول مقابلة مع عادل إمام

كشف الفنان عمرو عبدالعزيز،عن علاقته بالفنان الكبير عادل إمام، قائلا: "بالصدفة بعد انتهائي من مسرحية وخرجت علشان أروح وأنا واقف فى الشارع وقفت قدامى عربية وظهرت منها أيد بتشاورلى فذهبت لقيت عادل إمام فقالى: "أنت واقف فى الشارع بتعمل إيه دلوقتى وبعدها قالى هجيبك فى عمل معايا قريب".

وأضاف عمرو عبدالعزيز خلال لقائه ببرنامج "صاحبة السعادة" الذى تقدمه الفنانة والإعلامية إسعاد يونس، على قناة dmc، أنا من الفرحة روحت مشى على رجليا وقلت لأمى :"مش أنا قابلت عادل إمام فى الشارع".

المشاركة في فيلم مرجان أحمد مرجان

وتابع عمرو عبدالعزيز: "أنا قعدت فى المكتب مع عادل إمام ساعتين وقالى أنا بعمل فيلم عن الجامعة وشباب الجامعة اسمه مرجان أحمد مرجان ليك دور عندى لطيف تعمله؟ فقلتله طبعا يا أستاذ، وقالى مبروك توكل على الله، وبعد أسبوعين شاركت فى الفيلم، وآخر يوم فى الفيلم عيطنا علشان مش هنشوف الزعيم تانى".

ولفت عمرو عبد العزيز إلى أن عادل إمام كان بيحب حالة الشباب فى الجامعة بالفيلم، وكان بياكل معانا ويقعد معانا على الأرض، موضحا أنه بيحب أكل العسلية الكور".