محمد رضوان: ”رفضت أدوار كتير بعد رمضان حريقة.. وحصلي استقرار فني”
تحدث الفنان محمد رضوان، عن مشاركته في مسلسل "موضوع عائلي 2"، كما كشف تفاصيل مشاركته في أعماله المقبلة، خلال لقائه مع الإعلامي عمرو الليثي في برنامج واحد من الناس.
وأشار محمد رضوان إلى أنه كان هناك ممثل آخر متعاقد على دور رمضان حريقة، الذي جسده في مسلسل موضوع عائلي 2، حيث قال: كان في ممثل تاني متعاقد على شخصية رمضان حريقة، لكن اختلف مع فريق العمل على الأجر، وأحمد الجندي المخرج رشحني بداله، وماجد الكدواني رحب جدًا وقاله طبعًا ده دفعتي خليه ييجي.
وكشف رضوان أحد المشاهد التي لجأ للارتجال بها، قائلا: الخروج عن النص والسيناريو كان بيحصل بالاتفاق مع أحمد الجندي، كنت ساعات بحس إن رمضان حريقة لازم يقول هنا حاجة معينة، وأسال المخرج لو ينفع أقولها، ومشهد السفرة ده عدناه 13 مرة، وكل ما أزعق لـ طه دسوقي الناس تضحك والمشهد يبوظ.
وأضاف رضوان: جالي بعد الجزء التاني من مسلسل موضوع عائلي عروض كتير جدًا، ورفضت أدوار كتير لأن خلاص حصلي استقرار فني، فـ بقيت بقرأ المسلسل وأشوف حجم تأثيري فيه، وده بقى يأثر على اختياري للأدوار، لأني عايز الحاجات اللي تأثر في الناس.
واختتم محمد رضوان، متحدثًا عن أدواره المقبلة: هشارك في رمضان 2023، من خلال مسلسل بابا المجال مع مصطفى شعبان، عامل معاه تركيبة لطيفة، وفي السينما أشارك بفيلم لف وارجع تاني، بهدي نجاحي دايما لروح أبويا وأمي، لأنهم كانوا هيتبسطوا بالنجاح ده جدًا.
