مي القاضي: في ستات كتير بتخون ومسلسل صيد العقارب ليه حتة في قلبي
حلت الفنانة مي القاضي ضيفة على برنامج "الستات"، الذي تقدمه كل من الإعلامية مفيدة شيحة وسهير جودة عبر قناة النهار. كشفت مي القاضي عن تفاصيل أدوارها في رمضان الماضي في مسلسلي "صيد العقارب" و"رحيل".
وتحدثت مي القاضي عن تفاصيل أدوارها في المسلسلين، قائلة: "في ستات كتير بتخون، بس في رحيل أنا مكنتش خاينة. في رحيل، هي اتظلمت جامد فقررت تاخد حقها وإنها مش هتبقى ضعيفة وهتاخد حقها غصب عن أي حد".
وعن توقيت اختيارها للأدوار، قالت كاشفة: "صيد العقارب كان الأول وبعده رحيل". موضحة: "الدورين كانوا مختلفين جدًا عن بعض، بحب جدًا صيد العقارب وليه حتة في قلبي لوحده وبحب كواليسه".
وتابعت: "رحيل بحب الدور لإنه كان دور في دراما تقيلة، كانت بنت شعبية وده بعيد عني شوية فبيبقى تحدي أكتر وده بيخرج من الممثل أحلى".
وكشفت مي القاضي عن سبب حبها لكواليس مسلسل "صيد العقارب"، قائلة: "الأجواء كانت حلوة وهي حاجة مالهاش أسباب، كانت أحلى كواليس صيد العقارب". مضيفة: "غادة عبد الرازق ممثلة قوية جدًا، وبيبقى فيه ممثلات أقوياء بس بتبقى اهتماماتهم باللبس وبالفاشون مش قد غادة عبد الرازق، فأنا بحب التركيبة بتاعتها هي فيها كل حاجة".
وعن طبيعة شخصيتها، أوضحت: "لحد السنة اللي فاتت كنت خجولة إلا قدام الكاميرا. ده بالنسبة لي المساحة اللي باخد فيها راحتي وأنا بعمل شخصية حد تاني، وحاسة إني اتغيرت".
وعن سهولة العمل في الوسط الفني، أوضحت: "لا مش سهل، شغلنا مش سهل خالص. كل خطوة اللي بعدها أصعب دايمًا، بدايتي كانت سهلة لكن المشوار مكنش سهل، ولازم طول الوقت أشتغل على نفسي".
