إنجي خطاب: لأول مرة أخد قرار صح في حياتي وخبر اعتزالي ليس له علاقة بأي مشكلة في الفن
نشرت الفنانة إنجي خطاب، منذ قليل عبر حسابها الرسمي بفيسبوك منشورًا تؤكد فيه سبب اعتزالها، موضحة أن ليس له أي علاقة بأي مشكلة في الفن.
وكتبت إنجي: "للتوضيح بس علشان تقريبا مانمتش من مكالمات الصحفيين، على راسي كلهم وبحبهم كلهم.. يا جماعة والله قرار اعتزالي ليس له علاقة بأي مشكلة في الفن، وعندي عملين مضياهم كمان، واعتذرت ليهم إن مش هكمل.. يعني الشغل موجود الحمد لله".
واستكملت، "أنا اعتذرت لأني بقالي سنتين عندي صراع داخلي بين إن أكمل أو لا.. صراع رباني لطريق الصح واستخارت ربنا وألمهني هذا القرار، وعلشان كدا دا قرار نهائي لا رجعة فيه، وبكن كل الاحترام لزملائي في المهنة، وماعنديش مشكلة مع أي حد، وطول عمري في حالي كنت بشتغل بس، الموضوع كله اختيار طريق أنت بتحدده لنفسك، وياما مشينا طرق مش شبهنا في كل حاجة في حياتنا ورجعنا فيها، وبنحاول ناخد طريق صح ونرضي ربنا، وأنا مرتاحة جدا لقراري دا، وصليت استخارة وربنا ألهمني بهذا القرار، لأول مرة في حياتي أخد قرار صح، ومتأكدة إن ربنا هيكرمني في مجال تاني، وهركز في دراستي وأعمل الماجيستير والدكتوراه، وشكرا لحبكم ودعواتكم على راسي والله".
وكانت تصدرت الفنانة إنجي خطاب محركات البحث في الساعات الماضية، بعد إعلانها اعتزالها للفن نهائيًّا، حسبما كتبت على حسابها الرسمي بفيسبوك.
وكتبت إنجي: "أنا بعتذر لأي حد اتفقت معاه على عمل فني مش هقدر أعمله للأسف أنا واخدة قرار نهائي اعتزالي مهنة التمثيل نهائيا، ودا أحسن قرار أخدته في حياتي، وبكن كل احترام وتقدير لكل زملائي".
وتفاعل متابعيها على هذا المنشور ومن التعليقات التي كُتبت عليه، "الله ينور يا انجي أقسم بالله دعواتي مارحتش كدا وخلاص لأن فعلا أنا ليل نهار بدعيلك تبعدي عن المهنة دي، ودي أحسن حاجة تبقي مع ربنا بعيد عن القرف دا"، وقال آخر، "أنتِ حد محترم وتستاهلي كل خير والله بجد ربنا يبارك في حضرتك، و"ربنا يقدرلك الخير ويرضيكي بيه حيث كان، أنتِ صاحبة رسالة وأكيد ربنا هييسرك للخير، وإنك تكملي رسالتك في المكان اللي هو شايفهولك" و"كل التوفيق لك بحياة سعيدة بعيدا عن الفن الذي أصبح تجارة رخيصة".
وكان أول ظهور للفنانة إنجي خطاب للجمهور من خلال فيلم "الفرح"، كما شاركت أيضًا في عدد من المسلسلات منها "الحصان الأسود، واستيفا، ووش تاني، وسوق الخضار، والجزء الثالث من مسلسل نصيبي وقسمتك"، وشاركت في عدد من الأفلام منها "دكان شحاتة، وريكلام، وعمارة رشدي، ونعمة"، وغيرها من الأعمال.
