خالد عليش: بزعل لما بسمع خبر طلاق حد.. الموضوع مؤذي لكل الأطراف
أعرب المذيع خالد عليش عن استيائه من زيادة نسبة الطلاق في الفترة الأخيرة، وذلك من خلال منشور عبر حسابه الشخصي على موقع التواصل الاجتماعي فيسبوك.
وكتب خالد عليش: أنا بزعل جدًا لما بعرف خبر عن اتنين بيحصل انفصال بينهم خصوصا لو عدى على علاقتهم سنين وعشرة وبينهم أطفال.. أنا مؤمن جدًا أن الانفصال حتمي في حالة المشاكل الكبيرة والوصول لحائط مسدود وأما تخلص كل الحلول المتاحة ويمكن ده اللي حصل معايا في تجربة زواجي الأولى أنا مكنتش عايز انفصل بس فجأة مفيش حل غير الانفصال.
وتابع: أنا طبعا معرفش رواية كل اتنين انفصلوا ولا ايه الاسباب ورا ده ويمكن يكونو جربو كل الحلول وفشلو.. بس اللي أنا شايفة أن النسبة بتزيد أوي بقى في استسهال واستغناء والحالات كترها بقى يخوف أوي احنا مبقناش باقيين على بعض ولا قادرين نستحمل بعض لا ست ولا راجل.. مش مرتاحة معاه هامشي.. مش مرتاح معاها هاجري.
واضاف: أنا بقيت كل ما أسمع خبر انفصال بزعل جدا ومش بتكلم بس على شخصيات عامة بص حواليك هتلاقي نماذج كتير.. لو سمحت يا جماعة نستحمل بعض.. نبقى باقيين على بعض.. مهمين في حياة بعض.. مقدرين بعض.. بلاش تستسهلو الانفصال الموضوع مؤذي جدا لكل الأطراف حتى لو مفيش أطفال ما بالك بقى لو في أطفال.
