محمد فهيم يشيد بفيلم مرعي البريمو: خارج منه فرحان.. وكله مذاكر أوي
حرص الفنان الشاب محمد فهيم الإشادة بفيلم مرعي البريمو، الذي يعرض حاليًا في دور العرض السينمائية، وذلك من خلال منشور عبر حسابه الشخصي على موقع التواصل الاجتماعي فيسبوك.
وكتب محمد فهيم: حضرت العرض الخاص لفيلم مرعي البريمو وكان الشعور حقيقي عامل زي فرحة العيد.. عيد الضحك بجد واكتشفت أن في حياتنا حاجة اسمها نوستالچيا هنيدي، وكأنه كان واحشني جدا في السينما وأفلامه اللي بتدخلها وتضحك وتحس فيها بالبهجة وخارج فرحان، مش بس ضحكت في الفيلم وطلعت لأ، أنت خارج فرحان.
وتابع: عودة أستاذ سعيد حامد أهم حاجة حصلت في السينما السنادي.. حمد الله عالسلامة وبنحبك جدا وماتغيبش تاني.. منتخب الضحك في الفيلم ده بقيادة كابتن الفريق البريمو هنيدي.. الكل كان بيضحك بشخصيته في الخط بتاعه وكله مذاكر حلو أوي وبيضحك حلو اوي.. أنا حبيت كل الشخصيات.
واضاف: أستاذة غادة عادل وأستاذ احمد بدير والأستاذ محمد محمود والأستاذ لطفي لبيب الأستاذ علاء مرسي وأصحابي مصطفى أبو سريع ومحسن منصور وأحمد سلطان والبنات العسل جدا نانسي صلاح ونيللي محمود.. الاستاذ المخرج الكبير سعيد حامد قدر يخلق فريق عمل متجانس والحب ظاهر عالشاشة والكل حاضر بكل طاقته وسايب الكل يقول من منطقته.
واستكمل: والبريمو هنيدي مستمتع جدا وواخد الكل وطاير حقيقي.. من المكاسب الكبيرة كمان هو أن الفيلم إنتاج شركة جديدة والحقيقة أنا بفرح جدا كل ما الاقي كيان جديد في السينما بداية موفقة جدا وقادر عالنجاح لأنه اشتغل بأصول الشغلانة وطالما كل فريق العمل بيشتغل بالحب ده ومبسوط يبقى دي شركة ناجحة.. مليون مبروك للكل حقيقي وعندي شعور أن نجاح الفيلم هو نجاح لمعاني حلوة كتير وانتصار بأن لا يصح إلا الصحيح شكرا جدا.
