مدير منصة آي صاغة: خسارة الذهب حاليا «على الورق» ولا يوجد ما يجبر المدخر على البيع

ذكر سعيد إمبابي، المدير التنفيذي لمنصة "آي صاغة"، وخبير أسواق الذهب، أنه لم يُخفض توقعاته لمستقبل الذهب، قائلًا: "إحنا زي ما إحنا، مفيش أي حاجة غيرت النظرة دي أو المعادلة دي".

واستشهد "إمبابي"، خلال تصريحات لبرنامج "كلمة أخيرة"، المذاع عبر قناة "ON E"، مساء الأحد، بأزمة 2008، والتي تراجعت فيها أسعار الذهب بنحو 35% ليُعاود الارتفاع لاحقًا، مضيفًا: "كنا عند مستويات الـ1030 دولار تقريبًا، الذهب نزل لـ680 دولار، وبعد كده انطلق".

وأكمل: "لو بصينا على 2008 أسوأ قاع حصل للذهب، النهارده بقينا نتكلم في 4000 دولار وإحنا زعلانين".

وأشار إلى عدم وجود ما يُجبر مدّخري الذهب على بيعه خلال فترات الانخفاض: "العميل بتاع الادخار مفيش حاجة تجبره إنه يبيع"، مضيفًا: "ليه دلوقت حالًا تقرر إن الخسارة تخرج من الورق تبقى مادية".

وأكمل: "الخسارة دلوقت على الورق، طالما ذهبي في جيبي مفيش خسارة اتنفذت، أول ما اتحركت وبعت ذهبي أنا نفذت على نفسي الخسارة".

وشدد على أن الذهب يُعتبر استثمارًا طويل الأجل، ولا يجب التصرف به قبل مرور ما بين 3 و5 سنوات، لافتًا إلى تحقيقه على المستوى المحلي زيادة 55% خلال 2025.

واختتم: "الذهب مفيش قمة حققها ونزل عنها إلا ولما رجع لها مرة تانية"، مضيفًا: "ده مش وجهة نظر، دي سنة كونية، يعني إحنا الذهب هيفضل يغلى باستمرار".