محمد صبحي: أنا أكبر عيل في التاريخ.. ولا أعترف بالسن كأرقام

علق الفنان محمد صبحي على شعوره بتقدم العمر، قائلا: "أنا أكبر عيل في التاريخ، وأنا مش معترف بالسن بالأرقام، لأني أعتبر نفسي سنة ضوئية لا تقيس الزمن، بل تقيس المسافات. أنا جريت قد إيه؟ وعملت كام عمل؟ لكن سني كام لا يعنيني.. أنا عايش جوايا 17 سنة، ووقفت هنا تمامًا.

وأضاف محمد صبحي خلال لقائه ببرنامج "الصورة" الذي تقدمه الإعلامية لميس الحديدي على شاشة النهار: "نفسي أعمل بالذكاء الاصطناعي حاجة ترجعني طفل وأتفرج، لأني سأستمتع بالصورة التي تربّينا فيها.

وكشف الفنان محمد صبحي عن ذكريات رغبته في دراسة الفن ورفض والده لذلك في بداية مشواره، قائلاً: "لما دخلت ثانوية عامة قررت أدخل معهد تمثيل، فتفاجئت بطرد والدي لي من البيت. قلت خلاص هاعتمد على نفسي وهصرف على نفسي، لأنه كان يرى الوسط الفني، وكان يعمل فيه، وكانت وجهة نظره: من أنت بجانب يوسف وهبي؟ وكنت عاوز أنجح"

وتابع محمد صبحي: "التحقت بالمعهد بالغصب، وتفاجئت بتوصية من والدي بسقوطي، وكل الأساتذة تلامذته، سعد أردش وجلال الشرقاوي ونبيل الألفي، قال لهم يسقط.. مكنش عاوزني أدخل الوسط، وسعد أردش سألني: اسمك إيه؟ قلت له: محمد محمود، سألني: أبوك بيشتغل إيه؟ قلت: ساعي، سألني: أبوك اسمه إيه؟ خوفت أسقط، حتى قال لي: شايف السلم ده؟ عاوزك تمثل إنك طفل طالع وعمرك خمس سنين، ومرة تانية وأنت عندك خمسو وعشرين سنة، وبعدين وإنت عندك تمانين سنة"

واستكمل: "قلت كده عاوزين يتسلوا عليّ، وأنا كنت عندي عزة نفس كبيرة، فطلعت السلم بسن خمس سنوات، ونزلت بسن 25 سنة، وبعدين حطيت رجلي على السلم ووقفت، وكلهم ساكتين وقالوا لي: إحنا هنستناك ساعة؟ إطلع يابني؟ قلت لهم: مش قادر. لقيت اللجنة كلها 13 عضو بيصفقوا ونجحت."