مأساة يوسف محمد.. العنف والخيانة سرقا مستقبله وتركاه يصارع الألم
روى الشاب يوسف محمد، عامل الدليفري ضحية الاعتداء بمدينة بدر، تفاصيل ما تعرض له في واقعة مأساوية.
وقال يوسف خلال مشاركته في برنامج "هي وهما" الذي تقدمه الإعلامية أميرة عبيد على قناة الحدث اليوم،: "كنت مخلص شغلي وفي طريقي للمعهد، ولقيت مجموعة شباب في خناقة زي كل مرة، حاولت أهدّي الموقف وأفصل بينهم، لكن فوجئت بشخص معروف باسم (صابونة) بيشتمني بألفاظ سيئة، ورديت عليه بنفس الأسلوب بعدها على طول، واحد تاني اسمه عبد الرحمن طلعت جه واداني طعنة غادرة في ضهري من غير أي سبب."
وأضاف يوسف: "وأنا لسه مصدوم من الطعنة، لقيته مكمل عليّ وطعنني في وشي، والضربة دي أصابت العصب السابع، وخليت نص وشي الشمال كله مش بيتحرك ما بقتش قادر أرفع حاجبي أو أقفل عيني… حسيت كأني اتشللت."
وأكد أن لحظة الاعتداء كانت صادمة بالنسبة له: "أنا وقعت في دمي، والناس في المطعم اللي بشتغل فيه شافوا المنظر، خدوني بسرعة على المستشفى كنت بقول لنفسي أنا ليه اتعورت كده وأنا أصلاً حاولت أحل المشكلة؟"
وختم يوسف رسالته وهو يبكي: "أنا دلوقتي بين الحياة والألم، مش عارف مستقبلي هيبقى عامل إزاي نفسي أرجع زي الأول، ونفسي القانون يجيب حقي من اللي خربوا حياتي من غير سبب."
