بابا ورثنا حب إسكندرية.. رانيا فريد شوقي تستعيد ذكريات الطفولة
شاركت الفنانة رانيا فريد شوقي، جمهورها ذكرياتها في الإسكندرية معبرة عن حبها الكبير لها.
وكتبت رانيا على صفحتها الشخصية بموقع فيسبوك: "ده الشالية بتاعنا في المعمورة اسكندرية بس زمان مكنش مقفل بالالوميتال كده كان بلكونه بستاير
(اللي متعلم عليه في الصورة) بمعني اصح شالية فريد شوقي معروف في المنطقة كان ايجار قديم مساحة ١٠٠ متر تقريبا وكان يساع من القرايب و الحبايب الف ودي احله حاجة في المصايف اللمه مش مهم هنام فين الاهم معاك مين و علي رأي المثل البيت من غير ناس ما ينداس هو كان ٣ اوض نوم منهم اوضه صغيرة كانت بتاعة اختي مها قبل ما تتجوز و ٢ حمام وصاله و بلكونة ومطبخ له باب علي السلم اهو السلم ده كانت اعدتنا المفضله مع أصحابنا من أبناء الجيران كنا زمان الجيران كلها تعرف بعض مش زي دلوقتي المهم الصبح كنا ننزل البحر و نرجع نتغدا و علي الساعة ٨ نتجمع علي السلم او نروح الملاهي كوتا بارك كنا رباعي عبير و جيلان و رشا و انا ٤ بنات جيلان بنت اختي الكبيرة مني ورشا بنت اختي ناهد كنا تؤم ملتصق هههه دايما مع بعض مش هدوشكم و ارغي اكتر من كده بس لما شوفت الصورة حسيت اني عايزة أحكي أحلي ايام و ذكريات في حضن و دفئ العيله
الشالية ده لما بابا خده كان متجوز طنط هدي سلطان يعني اخواتي الكبار برضه ليهم ذكريات فيه بابا ورثنا حب اسكندرية".
