حسني شتا يكشف لحظات مرعبة عن زلزال لبنان: ”الفندق اتهز جامد”
روى الفنان حسني شتا تفاصيل لحظات مرعبة عاشها على إثر زلزال لبنان، الذي وقع فجر أمس الاثنين، ضمن الزلازل التي تعرضت لها البلاد، مشيرًا إلى حدوث الزلزال على مرتين متتابعتين إحداهما في الفجر والأخرى في الظهر.
وقال حسني شتا في تصريحات صحفية، "بعد أول زلزال طلعنا نمنا متأخر عشان كنا خايفين، وعلى الساعة 12 الظهر كنا في المطعم، وحسينا بزلزال تاني، بس كانت هزة أقل قوة من أول واحدة، ونزلنا تاني في اللوبي والناس كلها كانت خايفة والستات كانت بتعيط".
وتابع شتا كاشفًا سبب وجوده في لبنان: "الجو في لبنان مطر وبرق وده مزود الموضوع سوء، وأنا جاي عشان بنصور مسلسل الأجهر، وفريق العمل والفنان عمرو سعد شافوا معانا الحادثة دي، بس معظمنا في فنادق مختلفة، وحاليًا راجع مصر عشان عندي تصوير مش عشان الأجواء في لبنان".
في سياق آخر، كتب حسني شتا تغريدة عبر حسابه بموقع تويتر، جاء مضمونها على النحو الآتي: "قمت من النوم افتكرت إني دايخ وانا قاعد في الفندق، اكتشفت بعد ثواني أن الفندق بيتهز جامد واللبس في الدولاب بيتهز جامد والتليفون والأجهزة بتتحرك".
تابع حسني شتا: "طلعت من البلكونة لقيت المبني بيتمرجح يمين وشمال، واستشهدت وطلعت وكلمت صاحبي كان نايم صحيته وجريت على الأسانسير ونزلت لقيت الناس واقفة تحت، وواقفين في الشارع".